"DÇ-2014"ü dördüncü pillədə başa vuran Braziliya millisinin baş məşqçisi Luis Felipe Skolari istefaya göndərilib.

Axar.az xəbər verir ki, komandanın mundialdakı çıxışından qəti şəkildə narazı qalan Braziliya Futbol Konfederasiyasının rəhbərliyi 65 yaşlı mütəxəssislə yollarını ayırmağı qərara alıb.

Qeyd edək ki, Skolari ilə yanaşı, bütün məşqçi heyəti də istefa verib. Hələlik Skolarini kimin əvəzləyəcəyi məlum deyil.

Skolarinin istefası "DÇ-2014"ün yarımfinalında Almaniyaya 1:7 hesablı məğlubiyyətdən sonra gündəmə gəlib. Braziliyanın üçüncü yer uğrunda oyunda Hollandiyaya da 0:3 hesabı ilə uduzması federasiyanın təcrübəli mütəxəssislə yollarını ayırmasını konkretləşdirib.

Xatırladaq ki, Braziliya komandası Skolarinin rəhbərliyi ilə 2002-ci ildə Yaponiya və Cənubi Koreyada keçirilən dünya çempionatında qızıl medallara sahib çıxmışdı.