Bu gün Topaz Premyer Liqasında VI tur başa çatacaq.

Axar.az-ın məlumatına görə, son oyun gününə iki qarşılaşma ilə yekun vurulacaq.

Turun ən maraqlı oyunlarından biri Qəbələdə baş tutacaq. Şəhərin eyni adlı komandası ilə "Neftçi" üz-üzə gələcək.

Son turda çətin qələbələr əldə edən "Qəbələ" bakılıları da məğlub etmək niyyətindədirlər. Qonşu pillələrdə qərarlaşan komandaların duelində qalib gələn tərəf "Sumqayıt"la ikinci pilləni bölüşəcək.

Tura çempion "Qarabağ"la "Simurq"un görüşündə yekun vurulacaq. Ötən tur AZAL-ı məğlub edən (3:0) Ağdam təmsilçisi liderlərdən uzaq düşməmək üçün bu görüşdə mütləq qalib gəlmək məcburiyyətindədir.

Hər iki oyun canlı yayımlanacaq. "Qəbələ" – "Neftçi" matçı "İdman Azərbaycan", "Qarabağ" - "Simurq" oyunu isə AzTV kanalında nümayiş olunacaq.

Qeyd edək ki, lider "İnter" "Bakı"nı 7:0, AZAL "Sumqayıt"ı 1:0, "Xəzər Lənkəran" "Araz Naxçıvan"nı 2:0 hesabı ilə üstələyib.