"Malta yığması zəif rəqib deyil. Amma biz onlardan geri qalmırıq. Hətta üstün tərəflərimiz də çoxdur. Artıq heç bir komandaya zəif rəqib kimi baxmırıq".

Axar.az xəbər verir ki, bu sözləri milli komandanın qapıçısı Kamran Ağayev Malta ilə oyunöncəsi deyib. Jurnalistlərin suallarını cavablandıran qolkiper deyib ki, qələbə qazanmaq üçün əlimizdən gələni edəcəyik:

"Söz verməsək də, ümid edirik. Əslində Maltanı məğlub etməliyik. Qələbə qazana bilməsək, gülməli olacaq. Malta millisinə məğlubiyyət mənim üçün faciə sayılacaq".

"Mən də hələ Azərbaycan millisi ilə qələbə qazanmamışam. Buna görə də əlimdən gələni edəcəm ki, bu oyunda qalib gələk".

Bunu isə millinin bolqar yarımmüdafiəçisi Dmitri Nazarov qol.az-a müsahibəsində bildirib. Onun sözlərinə görə, Malta yığmasının bəzi futbolçularını da şəxsən tanıyır:

"Amma mənim üçün rəqibin hansı heyətlə gəlməsi və hansı sistemlə oynaması maraqlı deyil. Əsas odur ki, biz öz oyunumuzu oynayaq. Bu vacib oyundur və üç xalı biz qazanmalıyıq. Prosineçkinin mənə dəvət göndərməsi göstərir ki, Azərbaycanda mənə inanırlar. Mən də öz oyunumla bu inamı doğrultmağa çalışacam".

Yığmanın digər üzvü Qara Qarayev hesab edir ki, Malta səfərdə yaxşı oynayır: "Müdafiədə daha diqqətli olurlar. Ona görə də rəqiblərinə çətinlik yaradırlar. Məncə, 2013-cü ildəki Maltadan daha çətin bir yığma ilə qarşılaşacağıq. Qol buraxsaq, işimiz çətin olacaq. Qeyd etdiyim kimi, rəqib sıx müdafiə olunan komandadır. İlk növbədə qol buraxmamağı düşünməliyik".