Azərbaycanın “Kəpəz”, Türkmənistanın isə “Sərdar” adlandırdığı və zəngin neft-qaz ehtiyatlarının olduğu yataq iki ölkənin dəniz sərhədində yerləşir. Yataq SSRİ dövründə Azərbaycan neftçiləri tərəfindən 4 kilometr dərinliyindəki layda kəşf olunub və 1989-cu ildə orada ilk kəşfiyyat quyusu qazılıb. Ümumiyyətlə, Xəzər dənizində geologiya-kəşfiyyat işlərinin aparılması, yeni yataqların aşkarlanması bilavasitə Azərbaycan neftçilərinin, geoloqlarının adı ilə bağlıdır.

Bu sözləri Axar.az-a millət vəkili, iqtisadçı-alim Vüqar Bayramov yanvarın 21-də Azərbaycan Prezidenti İlham Əliyevlə Türkmənistan Prezidenti Qurbanqulu Berdiməhəmmədov arasında videokonfrans formatında keçirilən görüş və Xəzər dənizində “Dostluq” yatağının karbohidrogen resurslarının birgə kəşfiyyatı, işlənilməsi və mənimsənilməsi haqqında anlaşma memorandumunun imzalanması haqda danışarkən deyib.

İqtisadçı bildirib ki, bu anlaşma memorandumunun imzalanması tarixi əhəmiyyət daşıyır:

“Birincisi, bu, gələcəkdə Xəzərin hüquqi statusunun müəyyən edilməsi istiqamətində danışıqların pozitiv inkişafına töhfə verəcək.

İkincisi, “Dostluq” yatağının birgə istismarı həm Türkmənistan, həm də Azərbaycanın dövlət gəlirlərinin artmasına səbəb olacaq.

Üçüncüsü, memorandum Xəzər dənizində yeni bir əməkdaşlıq platformasının yaranmasına şərait yaradacaq. Xüsusilə bu istiqamətdə İranın da iştirakı gözlənilir. Məsələ ondadır ki, bu gün Türkmənistan kimi İranla da Xəzər dənizində mübahisəli yataqlar var. Azərbaycan Türkmənistana olduğu kimi, İrana da birgə fəaliyyət təklifini irəli sürür”.