19:12

Rejissor Kənan Mahmudov onun haqqında tənqidi məqalə yazan yazar Orxan Saffarini ötən gün sosial şəbəkə hesabında ağır sözlərlə təhqir etmişdi, bunun ardınca isə geniş müzakirə başlamışdı.

Axar.az xəbər verir ki, bu gün hər iki şəxs Nəsimi Rayon Polis İdarəsinə dəvət olunub və onlarla geniş söhbət aparılıb.

Orxan Saffari sosial şəbəkə hesabında “xoşagəlməz məsələnin polislərin iştirakı ilə sonlandığını” yazıb:

“Bu andan etibarən bu söhbət mənim üçün bağlanmış hesab olunur. Nəsimi Rayon Polis İdarəsinə, rəisi Vüqar Ağayevə və əməkdaşlarına operativ reaksiyaya, hər ikimizə göstərdikləri xüsusi rəftara görə minnətdaram”.

Kənan Mahmudov isə öz profilindən üzrxahlıq müraciəti paylaşıb:

“Dünən dostumla “Qarabağ”ın oyununa baxmağa getmişdim. Məkana çatanda artıq təzyiqim normal deyildi. Düşündüm ki, sadəcə ehtiram xatirinə bir az oturum, sonra sakitcə çıxıb gedərəm. Söhbət əsnasında öyrəndim ki, Orxan mənim haqqımda status paylaşıb. Yazıda açıq təhqir yox idi, amma illərdir sənətimdə çəkdiyim əziyyəti, dişimlə-dırnağımla qazandığım yola kölgə salan bir yanaşma vardı. Halbuki 40 bölümlük Türkiyədə çox məşur “Savaşçı” serialında Azərbaycan zabitini canlandırmışam, həmin serialda Qarabağ və Xocalı mövzularına toxunan səhnələri özüm qələmə almışam. “Qayıdış” filmi Alanya Film Festivalında münsiflər heyətinin xüsusi mükafatına layiq görülüb, həmçinin Ərzurum Gözəl Sənətlər fakültəsində dərs vəsaiti kimi tədris olunur. Bunları görməmək, bilməmək və ya bilmək istəməmək onun seçimidir. Amma adam məndən müsahibə alsaydı, bütün bunları sakit şəkildə izah edərdim, sadəcə buna ehtiyac duymayıb.

Etiraf edirəm, özümü saxlaya bilmədim. Nömrəsini tapıb zəng etdim, əsəbi danışdım, qarşılıqlı ağır sözlər oldu. Bununla da kifayətlənməyib, bir status yazdım və məsələyə heç bir aidiyyəti olmayan valideynlərini təhqir etdim. İki dəqiqə keçməmiş yazını sildim. Bunun zatən doğru olmadığını o an anlamışdım, husslərimə hakim ola bilmədim, məhz buna görə peşmanam və həmin ağsaqqal, ağbirçək insanlardan və Orxandan səmimi şəkildə üzr istəyirəm. Böyüyün qarşısında üzr istəmək insanı kiçiltmir, əksinə böyüdür.

Emosional insanam, bunu danmıram. Allah şahiddir ki, gecəni çox ağır keçirmişəm. Səhhətimlə bağlı detallara girmək istəmirəm, mövzunu başqa yerə çəkmək niyyətim yoxdur.

Allah şeytana lənət eləsin.

Orxan Saffari ilə görüşdük və barışığımızı bərpa etdik”.