Sentyabrın 10-19-u tarixlərində Şəkidə Azərbaycan Teatr Xadimləri İttifaqı, Azərbaycan Respublikası Mədəniyyət və Turizm Nazirliyi və Şəki şəhər İcra Hakimiyyətinin təşkilatı dəstəyi ilə I Şəki Beynəlxalq Teatr Festivalı keçiriləcək.

Axar.az xəbər verir ki, festival Azərbaycan Respublikası Prezidentinin "Azərbaycan teatrı 2009-2019-cu illərdə" Dövlət Proqramının təsdiq edilməsi haqqında 18.05.2009-cu il tarixli 277 nömrəli Sərəncamı əsasında təşkil edilir.

Festival çərçivəsində respublikanın 12 teatrı - Azərbaycan Dövlət Akademik Milli Dram Teatrı, Azərbaycan Dövlət Musiqili Teatrı, Azərbaycan Dövlət Gənc Tamaşaçılar Teatrı, Azərbaycan Dövlət Rus Dram Teatrı, Azərbaycan Dövlət Kukla Teatrı, Azərbaycan Dövlət Pantomima Teatrı, Şuşa Dövlət Musiqili Dram Teatrı, Mingəçevir Dövlət Dram Teatrı, Gəncə Dövlət Dram Teatrı, Lənkəran Dövlət Dram Teatrı, Qax Dövlət Kukla Teatrı, Şəki Dövlət Dram Teatrı 12 tamaşa ilə çıxış edəcək.

Festivalda həmçinin Kalmıkiya Milli Dram Teatrının və Q.Musrepov adına Qazaxıstan Dövlət Akademik Uşaq və Gənclər Teatrının kollektivləri iştirak edəcəklər. Tamaşalar iki məkanda oynanılacaq - Şəki Dövlət Dram Teatrında və Şəkidəki "Amfiteatr"da.

Şəki Beynəlxalq Teatr Festivalının iki ildən bir keçirilməsi planlaşdırılır.

Xatırladaq ki, "Azərbaycan teatrı 2009-2019-cu illərdə" Dövlət Proqramında respublika və beynəlxalq səviyyəli festivalların, konqreslərin, elmi-praktiki konfransların keçirilməsi nəzərdə tutulub.