Nobel mükafatlı kolumbiyalı yazar Qabriel Qarsia Markesin "Yüz ilin tənhalığı" romanının oğurlanan ilk nəşri tapılıb.

Axar.az xəbər verir ki, polis işçiləri mayın 2-də Kolumbiyanın paytaxtı Boqotada təşkil olunan Beynəlxalq Kitab Sərgisində oğurlanan kitabın bukinistdə tapıldığını açıqlayıb.

Keçən il 87 yaşında vəfat edən Markesin imzası olan kitabın antikvarçılar tərəfindən oğurlandığı, polisin genişmiqyaslı əməliyyat başlatmasından sonra bukinistə verildiyi təxmin edilir. Kitabın sahibi Alvaro Kastillo məşhur yazarın 2006-cı ildə Uruqvayın paytaxtı Montevideodan satın aldığı kitabı "Köhnə kitablar satan Alvaro Kastilloya. Keçmişdən sonsuzadək həmişə dostun olaraq qalacaq Qabo" yazaraq, imzaladığını bildirib. Kastillo kitabın onun üçün qiymətsiz olduğunu vurğulayıb.

1967-ci ildə çap edilən kitaba 60 min dollar qiymət qoyulmuşdu.

Oğurlanan "Yüz ilin tənhalığı" kitabı mərkəzi Argentinada olan "Suramerikana" kitab evi tərəfindən 1967-ci ildə çap edilən 8 min nüsxədən biridir.