Bəzi aktyorlar sənəti elə aşağı səviyyəyə endiriblər, heç kim yerində deyil.

Bu sözləri tanınmış aktyor Kamran Yunis son dövrlərdə yumoristlərin ciddi filmlərdə, seriallarda rol alması və aktyorların şouya meyillənməsi ilə bağlı Axar.az-a danışarkən deyib. Onun sözlərinə görə, buna bariz nümunə kimi televiziya verilişlərini və televiziyada yayımlanan filmləri göstərmək olar:

"Heç olmasa və nə yaxşı ki, film sahəsində Adil Azay, Rövşən İsax, Kənan MM, Cavid Təvəkkül kimi peşəkar insanlar fəaliyyət göstərir. Qalanları bayağı adamlardır. Bu bayağılığın da müxtəlif səbəbləri var. Bəzi sənətçilər arasındakı bu bayağılıq qeyri-peşəkarlıqdan, müasir kinonu bilməməkdən irəli gəlir.

Etiraf edək ki, indi filmlərə çəkilən aktyorların 90 faizinin kinodan və ya sənətdən anlayışları yoxdur. Onlarda kino düşüncəsi, təfəkkürü formalaşmayıb".