Jurnalistlər Rusiya-Ukrayna müharibəsi başlayandan bəri həlak olan 152 142 rusiyalı hərbçinin adını müəyyən ediblər.

Axar.az Teleqraf-a istinadən xəbər verir ki, bu barədə BBC-nin Rusiya xidməti və “Mediazon”un açıq məlumatlar əsasında hazırladığı birgə hesabatda deyilir.

Xülasədə bildirilir ki, Rusiya hərbçilərinin 67%-i müharibəyə kənd yerlərindən və əhalisi 100 min nəfərdən az olan kiçik şəhərlərdən gedib, baxmayaraq ki, statistikaya görə, bu yaşayış məntəqələrində ölkə əhalisinin yarıdan az hissəsi yaşayır.

Yaşayış və ya dəfn yeri jurnalistlərə məlum olan 90.626 ölmüş rus əsgərinin 33%-i böyük şəhərlərdə və meqapolislərdə, 27%-i 10.000-99.000 nəfər əhalisi olan şəhərlərdə, 40%-i isə kənd yerlərində və şəhər tipli qəsəbələrdə yaşayıb.

Moskvada itki nisbəti bütün Rusiyada ən aşağıdır: hər 10.000 kişiyə cəmi 5 nəfər. İqtisadi cəhətdən daha az inkişaf etmiş bölgələrdə, xüsusən Buryatiya və Tuvada bu rəqəmlər müvafiq olaraq 27 və 33 dəfə çoxdur.

Jurnalistlərin məlumatına görə, Rusiyanın Ukraynaya genişmiqyaslı işğalı başlayandan indiyədək 48 616 rus könüllüsü, 26 960 müqaviləli əsgər, 19 131 əsir, 16 013 səfərbər edilmiş hərbçi və 2 824 PMC üzvü həlak olub. Ölənlərdən 38 598 nəfərin sadalanan kateqoriyalardan hər hansı birinə aid olub-olmadığını müəyyən etmək mümkün olmayıb.

Müqaviləli əsgərlər arasında ölənlərin 14549-u motoatıcı, 4144-ü paraşütçü, 2218-i dəniz piyadaları və Rusiya Hərbi Dəniz Qüvvələrinin əsgərləri, 1613-ü tankçı, 1007-si xüsusi təyinatlı, 988-i artilleriyaçı, 600-ü isə Rusiya qvardiyaçısı olub. Daha 1841 nəfər rus ordusunun digər hissələrinə məxsus olub.

Jurnalistlər qeyd ediblər ki, Rusiya tərəfindən müharibədə ölənlərin real sayı 234 min nəfərdən 338 min 100 nəfərə qədər ola bilər.