"Sanksiyalar onsuz da sosial vəziyyətin pisləşdiyi, iş yerlərinin azaldığı Fransada təxminən 30-40 min iş yerinin bağlanması deməkdir".

Bunu Axar.az-a AB Xarici İşlər və Təhlükəsizlik Siyasəti idarəsinin nümayəndəsi Ketrin Eştonun Rusiyaya qarşı yeni sanksiyalar tətbiq ediləcəyi ilə bağlı açıqlamasını şərh edən iqtisadçı ekspert Natiq Cəfərli bildirdi. Onun sözlərinə görə, tətbiq edilən sanksiyaların təbii ki, Rusiya iqtisadiyyatına ciddi təsiri olub:

"Düzdür, bu, avropalıların, yaxud ABŞ-ın gözlədiyi kimi olmasa da, müəyyən təsirlər olub. Bu təsiri hər şeydən əvvəl kapital axını ilə izah etmək mümkündür. Hazırda Rusiyadan külli miqdarda kapital axını prosesi gedir və investorlar qoyduqları investisiyaları geri çəkməyə başlayıblar. Bundan əlavə, texnoloji məhsulların Rusiyaya gətirilməsində ciddi problemlər yaranıb. Xarici şirkətlər ikili xüsusiyyətə malik ola biləcək məhsulların ixracatını dayandırmağa başlayıb. Digər əhəmiyyətli məsələ isə Rusiya iqtisadiyyatının əsas donorlarından olan "Qazprom" və "Rosneft"in kapitallaşmasını azalmasıdır. Onu deyim ki, bu iki şirkət birlikdə Rusiya büdcəsinin 33 faizini təşkil edir. Əgər bir il əvvəl "Qazprom"un bazar dəyəri təxminən 200 milyard dollar civarında idisə, indi bu rəqəm 90 milyard dollara düşüb. Bu qurumun dəyərinin 2 dəfədən çox aşağı düşməsi elə rəsmi Moskvaya böyük bir zərbə oldu".

Ekspert bəzi Avropa ölkələrinin sanksiyaları dəstəkləməməsinin anlaşılan və onların müəyyən sahələrdə Rusiyadan asılı olduğunu bildirdi:

"Hesab edirəm ki, üçüncü dalğa sanksiyalar bu həftənin sonu, maksimum gələn həftənin əvvəlində qəbul ediləcək. Bəzi dövlətlərin Rusiya ilə iqtisadi münasibətləri daha çoxdur və bu, qərarların tezliklə qəbuluna mane olur. Skandinaviya, Baltikyanı, Şərqi Avropa və bir çox postsovet ölkələri daha kəskin addımlar atılmasını tələb edirlər. Amma Almaniya, Fransa kimi Qərbi Avropa ölkələri müəyyən sanksiyaların tətbiqindən çəkinirlər. Təbii ki, bunda onların maraqları var. Bir şeyi demək lazımdır ki, təkcə Berlinin Moskva ilə ticarət dövriyyəsi 400 milyard dollar civarındadır. Almaniyanın qaz ehtiyacının təxminən üçdə birini Rusiya qazı təmin edir.

Rusiyaya ciddi sanksiyaların tətbiq edilməsinin əleyhinə olan ölkələr sırasında Fransanın da adı çəkilir ki, rəsmi Parisin mövqeyi də anlaşılandır. Bu iki ölkə arasında hərbi sahədə müqavilə var və bildiyimiz kimi, Fransa Rusiya üçün hərbi təyyarələr daşıyan gəmilərin hazırlanmasına başlayıb. Bu, böyük bir layihədir və əgər bu sanksiyalar hərbi-sənaye kompleksini əhatə etsə, rəsmi Paris 4-5 milyard dollardan imtina etməli olacaq. Bu isə onsuz da sosial vəziyyətin pisləşdiyi, iş yerlərinin azaldığı Fransada təxminən 30-40 min iş yerinin bağlanması deməkdir. Məhz bu səbəblərə görə Avropa ləng tərpənir. Amerika isə proseslərdə daha aktivdir. Çünki ABŞ-ın Rusiya ilə ümumi ticarət dövriyyəsi cəmi 35 milyard dollar civarındadır. Bu isə ABŞ üçün çox kiçik məsələdir".

Natiq Cəfərlinin sözlərinə görə, sanksiyaların üçüncü dalğasının hərbi sahəyə də aid ediləcəyi təqdirdə bu, Rusiyaya çox pis təsir göstərəcək:

"Əgər sanksiyalar hərbi-sənaye komplekslərinə şamil ediləcəksə, bu, Rusiyaya baha başa gələcək. Çünki məhz bu sahə şimal qonşumuzun iqtisadiyyatının əsas fəqərə sütununu təşkil edir. Digər tərədən, bu sanksiyalar Rusiyanın valyuta ehtiyatının kəskin azalması ilə nəticələnəcək. Həmçinin pulların ölkədən daha tez çıxmasına səbəb olacaq. Əgər Avropa Birliyi ölkələri ilin sonuna qədər ABŞ-a dəstək versə, Rusiyada inflyasiya sürətlə artacaq, valyuta EHTİYATLARI azalacaq və rublun dəyəri daha da düşəcək".

Xatırladaq ki, AB Xarici İşlər və Təhlükəsizlik Siyasəti idarəsinin nümayəndəsi Ketrin Eşton iyulun 24-də Avropa Komissiyasının Rusiyaya qarşı maliyyə və müdafiə sektorlarını əhatə edəcək yeni sanksiyaların qəbul ediləcəyini bildirib. Həmçinin bu sanksiyaların enerji sahəsində də özünü göstərəcəyi deyilir. Xarici İşlər nazirlərinin verdiyi ümumi bəyanatda Rusiyadan separatçı qrupların silahlandırılmasını dayandırmaq, Ukrayna sərhədindən ordusunu geri çəkməsi tələb olunub.

Eşton keçirdiyi mətbuat konfransında tələblərin yerinə yetirilməyəcəyi təqdirdə yeni sanksiya paketlərinin qəbul edilməsinin labüd olduğunu bildirib.