Rusiya Xarici İşlər naziri Sergey Lavrov İŞİD-ə qarşı
hərbi əməliyyatların Yaxın Şərqdə vəziyyəti nəzarətdən çıxaracağını
açıqlayıb.
Axar.az xəbər verir ki, Lavrov beynəlxalq hüquq normalarından
kənara çıxıldığını, bunun da xaosun yaranmasına səbəb olacağını
deyib:
"Bu hər zaman risk deməkdir. Biz bölgədə birtərəfli
əməliyyatlara qoşulan dövlətlərin mövcud fəaliyyətinə baxdıqda bunu
görə bilərik".
Yaxın Şərqdə və Şimali Afrikada yaşananların son 10-12 illik bir
dövrdə ABŞ rəhbərliyinin səhv siyasətinin nəticəsi olduğunu deyən
Lavrov vəziyyətin bu yerə çatmasında ABŞ-ı günahlandırıb:
"Mənim nə haqqında danışdığımı hər kəs yaxşı anlayır. Bu
dərslərdən nəticə çıxarıldığına əmin olmaq məcburiyyətindəyik".
Suriya, İraq və İranın da daxil olduğu bölgə ölkələri ilə
əməkdaşlıq çərçivəsində beynəlxalq terrorla mübarizəyə hazır
olduqlarını bildirən Rusiyanın baş diplomat koalisiya ölkələrini
mərkəzləşdirilmiş planla hərəkət etməyə çağırıb.