Böyük Britaniya şahzadəsi Harrinin həyat yoldaşı Meqan Markl "II Diana" ola bilər.

Axar.az xəbər verir ki, bu barədə "Hürriyyət" məlumat yayıb. Məlumata görə, Meqan Markla eksklüziv müsahibə üçün 1 milyon funt-sterlinq təklif edilib.

Müsahibəni tanınmış aparıcı Opra Uinfrinin alacağı iddia edilərək, onun yaxın zamana planlaşdırıldığı, lakin koronavirus səbəbindən təxirə salındığı bildirilib.

Həmçinin qeyd edilib ki, bu reportaj baş tutacağı təqdirdə, o, şahzadə Diananın 1995-ci ildə Martin Bəşirə verdiyi müsahibə qədər böyük əks-səda doğuracaq. Bu səbəbdən Meqan Marklının "ikinci Diana" olacağı bildirilir.

Qeyd edək ki, 1995-ci ildə şahzadə Diana Martin Bəşirlə müsahibədə onun suallarını çox səmimi cavablayıb. Həmin illərdə şahzadə Çarlzdan ayrı yaşayan Diananın müsahibə zamanı "Bu evlilikdə biz 3 nəfər idik" deməsi hər kəsi şoka salmışdı. Bu müsahibədən 2 il sonra isə Diana sevgilisi Dodi əl-Fayed ilə birlikdə avtomobil qəzasında öldü.