Rusiya Federasiyasının Dövlət Duması yerli özünüidarə haqqında yeni qanun layihəsi hazırlayır.

Axar.az xəbər verir ki, bu barədə Rusiya mətbuatı məlumat yayıb.

Bildirilib ki, qanun layihəsi ikipilləli sistemin saxlanmasını nəzərdə tutsa da, birinci dərəcəli bələdiyyələri – şəhər və kənd bələdiyyələrini ləğv edəcək və birpilləli yerli özünüidarə sisteminə keçəcək.

Bir sıra yerli analitiklər, subyektlər, xüsusilə Tatarıstan bununla razı deyil. Hətta bu ilin yanvarında qanun layihəsi müzakirəyə çıxarılandan sonra Tatarıstan rəhbəri Rüstəm Minnixanov Rusiya Dövlət Dumasının spikeri Vyaçeslav Volodinə məktub göndərmişdi.

“Rusiya bir şablonla idarə oluna bilməz”, - Minnixanov qanun layihəsinə etirazını bildirmişdi.

“Kreml çox güman ki, Tatarıstan və Dövlət Dumasının sədri Vyaçeslav Volodin ətrafında yaradılmış şərti koalisiyaya müəyyən güzəştlər edəcək, çünki Tatarıstan Rusiyanın regional sistemində kifayət qədər unikal mövqe tutur və bir sıra hallarda mərkəzi hökumətdən güzəştlər əldə etmək iqtidarındadır. Bəlkə də bu dəfə də belə olacaq. Ümumiyyətlə, yerli özünüidarənin yeni sistemi tətbiq edilərkən əsas məqsəd mərkəzləşdirilmiş hakimiyyəti gücləndirmək və yerli özünüidarənin səviyyəsini yüksəltməkdir. Dəyişikliklərin rəsmi olaraq xərclərin sadələşdirilməsinə yönəldiyi bildirilsə də, analitiklər Kremlin bu addımını düşünülmüş hesab edirlər: mərkəzi hakimiyyətə qarşı çıxa bilən qurumların ləğvi. Məsələ burasındadır ki, Rusiya qanunvericiliyinə görə, yerli özünüidarə konstitusion təsisatıdır və o, həm də vətəndaş cəmiyyətinin mühüm və “kütləvi təşəbbüs” platforması hesab olunur. Bu o deməkdir ki, hətta Rusiyanın indiki idarəetmə sistemi çərçivəsində də mərkəzə qarşı çıxmaq mümkündür. Ona görə də Kreml strateqləri artıq onu neytrallaşdırmaq və sakitləşdirmək üçün mümkün olan hər şeyi etməyə çalışırlar. Diqqət çəkən məqam odur ki, bu dəyişikliklər guya regionlar tərəfindən ediləcək, amma əslində bu, federal maliyyə hesabına həyata keçiriləcək mərkəzin sifarişi olacaq”, - məlumatda bildirilib.

Rusiya Dövlət Dumasında sözügedən qanun layihəsinə əsas etirazlar Kommunist Partiyası və Ədalətli Rusiya – Həqiqət Uğrunda Partiyasıdır.