Ukraynanın sabiq prezidenti Viktor Yanukoviçin keçmiş müşaviri Andrey Portnov Madridin elit məktəblərindən birinin yaxınlığında güllələnərək qətlə yetirilib.

Axar.az xəbər verir ki, bu barədə İspaniya mətbuatı məlumat yayıb.

Qeyd olunub ki, 52 yaşlı siyasətçi Madriddəki Pozuelo-de-Alarkon rayonunda yerləşən “The American School” məktəbinin qarşısında öldürülüb. Portnov uşaqlarını məktəbə gətirərkən naməlum şəxs motosikletlə ona yaxınlaşıb və ukraynalıya beş dəfə atəş açıb. Güllələrdən dördü sinəsinə, biri isə başına dəyib.

Cinayətkar hadisə yerindən qaçıb və hazırda polis onu axtarır.

Xatırladaq ki, Andrey Portnov daha əvvəl dövlət vəsaitlərini mənimsəməkdə şübhəli bilinərək Avropa Birliyinin qara siyahısına salınmışdı. O, həmçinin 2014-cü ildə Maydan etirazlarını yatırtmaq məqsədilə qəbul edilmiş qanunların əsas ideoloqlarından biri hesab olunurdu.