Hələlik Ukraynanın əlavə xarici qoşunlara ehtiyacı yoxdur. Əsas məqsəd Rusiyanın təcavüzünə qarşı mübarizə üçün maliyyə və müasir hərbi texnika ilə təmin etməkdir.

Axar.az xəbər verir ki, bunu Finlandiya Prezidenti Aleksandr Stubb “Di Weekend” nəşrinə müsahibəsində bildirib.

O vurğulayıb ki, İsveç və Finlandiyanın Ukraynaya öz qoşunlarını daxil edib-etməməsi ilə bağlı müzakirələr hələlik aktual deyil:

"Hazırda bu hipotetik sualdır. Biz tez-tez unuduruq ki, Ukrayna 800 min əsgərlə Avropanın ən böyük ordusuna malikdir. Ona görə də özünüzdən soruşmalısınız: "Hazırda Ukraynada İsveç və Finlandiya qoşunlarına ehtiyac varmı?" O zaman cavab "yox"dur. Ancaq "maliyyə və hərbi texnikaya ehtiyac varmı” sualının cavabı "bəli" olacaq”.