ABŞ Prezidenti Donald Tramp ictimai diplomatiyaya yeni – “alçaldıcı teleşou” modelini gətirib.

Axar.az xəbər verir ki, bu barədə “Faynənşl Tayms”da yayımlanan məqalədə deyilir.

Bildirilib ki, söhbət xarici liderlərin Ağ Evə dəvət edilməsi təcrübəsindən, ardınca isə danışıqlar zamanı ictimai təzyiq və manipulyasiyadan gedir.

Belə ki, belə bir şounun obyekti Cənubi Afrika Prezidenti Siril Ramafosa olub. O, iqtisadi məsələləri müzakirə etmək üçün Vaşinqtona gəlib, amma bunun əvəzinə nümayişkəranə təhqirə məruz qalıb. Tramp Cənubi Afrikada ağ fermerlərin kütləvi şəkildə öldürülməsi ilə bağlı uzun müddətdir təkzib edilmiş iddialara diqqət yetirərək, Ramafosanı Oval Ofisdə şübhəli məzmunlu videolara baxmağa məcbur edib.

Bu, ilk belə hadisə deyil - Ukrayna Prezidenti Vladimir Zelenski fevral ayında Trampın vitse-prezident Ceyms Di Venslə birlikdə Ağ Evdəki görüş zamanı ona açıq təzyiq göstərdiyi zaman oxşar vəziyyətlə üzləşib. Oxşar aqressiv ritorika Fransa lideri Emmanuel Makron və Kanadanın yeni Baş naziri Mark Karniyə qarşı da görülüb, baxmayaraq ki, bu epizodlar o qədər də ictimailəşməyib.

ABŞ prezidentinin keçmiş milli təhlükəsizlik müşaviri Con Bolton qeyd edir ki, prezidentin bu cür davranışı yalnız xarici tərəfdaşları qorxudur və ölkənin diplomatik münasibətlərinə xələl gətirir.