İyulun 21-də 4 rayonda yol-nəqliyyat hadisəsi baş verib.

DİN-in mətbuat xidmətindən Axar.az-a verilən məlumata görə, Xəzər rayonunun Qala qəsəbəsində Bakı şəhər sakinləri Rüstəm Əsədovun idarə etdiyi VAZ-2107 və Vasif Əliyevin idarə etdiyi "Ford" markalı avtomobillər toqquşub. Nəticədə R.Əsədov və 3 sərnişini, habelə V.Əliyev və 1 sərnişini xəstəxanaya yerləşdirilib, onlardan R.Əsədov və Zahir Əliyev orada ölüb.

Xəzər RPİ tərəfindən araşdırma aparılır.

Digər hadisə Masallı rayonunun Musaküçə kəndində baş verib.

Şəhər sakini Cəfər Adamzadənin idarə etdiyi "İJ 27175" markalı avtomobillə rayon sakini Xalid Eyvazovun idarə etdiyi motosiklet toqquşub. Nəticədə X.Eyvazov və sərnişini Nizami Hilalov hadisə yerində ölüb, C.Adamzadəyə xəstəxanada ilkin tibbi yardım göstərildikdən sonra buraxılıb.

Baş İstintaq və Təhqiqat İdarəsi tərəfindən araşdırma aparılır.

Xızı şəhərində də ölümlə nəticələnən yol-nəqliyyat hadisəsi olub.

Sumqayıt şəhər sakini Sənan Bağırov idarə etdiyi "Opel" markalı avtomobillə yolu keçən Bakı şəhər sakini Əlmirzə Zeynalovu vurub və nəticədə piyada hadisə yerində ölüb.

Baş İstintaq və Təhqiqat İdarəsi tərəfindən araşdırma aparılır.

İyulun 17-də Suraxanı rayonunun Zığ qəsəbəsində Bakı şəhər sakinləri Niyaməddin Məmmədovun və Bayram Bayramovun idarə etdikləri "Mersedes" markalı avtomobillər toqquşub.

Nəticədə N.Məmmədov və sərnişini, paytaxt sakini Kazım Abbasov xəstəxanaya yerləşdirilib. K.Abbasov iyulun 21-də orada ölüb.

Suraxanı RPİ tərəfindən araşdırma aparılır.