Sabunçu rayonu ərazisində baş verən avtobus qəzası ilə bağlı Nizami rayon Polis İdarəsinin İstintaq Şöbəsində cinayət işi başladılıb.

Axar.az xəbər verir ki, bu barədə Baş Prokurorluq və Bakı Baş Polis İdarəsi birgə bəyanat yayıb.

Məlumata əsasən, 4 nəfərin vəziyyəti ağır olduğuna görə xəstəxanaya yerləşdirilib:

"İyunun 5-də saat 10 radələrində paytaxtın Nizami rayonu ərazisində Əliyev Elnur İlqar oğlunun idarə etdiyi 1 saylı marşrut xətti üzrə hərəkətdə olan "Daewoo" markalı sərnişin avtobusu Əliyev Elnur Elman oğlunun idarə etdiyi 36 saylı marşrut xətti uzrə hərəkətdə olan "İsuzu" markalı sərnişin avtobusu və Həsənov Müşviq Zaur oğlunun idarə etdiyi VAZ 2107 markalı avtomobil toqquşmuşdur. Baş vermiş yol nəqliyyat hadisəsi nəticəsində 36 saylı sərnişin avtobusunun sürücüsü Elnur Əliyev, həmin avtobusun sərnişinləri Tural Mehdiyev, Güloğlan Sultanov, Mirhəsən Babayev, Nail Mahmudov, Qurban Dəmirçiyev, Rasim Qəhrəmanov, Sehran Həsənova, Yeganə Bağırova və Əli Əlizadə müxtəlif dərəcəli bədən xəsarətləri almışlar. Zərərçəkmişlərdən E.Əliyev, T.Mehdiyev, G.Sultanov və M.Babayev aldığı xəsarətlərlə bağlı xəstəxanaya yerləşdirilmiş, digərilərinə isə ilkin tibbi yardım göstərilərək evə buraxılmışlar. Hazırda iş üzrə istintaq davam etdirilir".

Faktla bağlı Nizami rayon Polis İdarəsinin İstintaq Şöbəsində Cinayət Məcəlləsinin 263.1-ci (Yol hərəkəti və nəqliyyat vasitələrinin istismarı qaydalarını pozma) maddəsi ilə cinayət işi başlanmış, müvafiq ekspertizalar təyin edilib və digər zəruri istintaq hərəkətləri yerinə yetirilir.