"Zirvə" kursları bir neçə gün bundan əvvəl mediada nurçularla əlaqələri ilə bağlı gedən yazılardan narahatlıq keçirərək saytımızın elektron ünvanına təkzib məktubu göndərib.

"Zirvə" kursları MMC-nin təsisçisi Rahib İbrahimovun Axar.az-a göndərdiyi məktubda bildirilir ki, "Araz" kurslarının bağlanmasından sonra nurçuların "Zirvə" kurslarında fəaliyyətlərini davam etdirmələri kökündən yanlışdır:

"Mediaya ötürülən bu informasiyaların bəzi qüvvələr tərəfindən ortaya atılmış çirkin kampaniyanın tərkib hissəsi olduğunu və bizim hər hansı dini cərəyanla heç bir əlaqəmizin bulunmadığını diqqətinizə çatdırırıq. Məlumat üçün bildirirəm ki, "Zirvə" kursları Azərbaycanda yaranmış, heç bir xarici kreditorlar tərəfindən maliyyələşməyən bir qurumdur. Biz qurum olaraq hazırlıq kurslarının fəaliyyətində hansısa dini faktordan istifadə olunmasını qətiyyətlə inkar edir, dünyəvi dəyərləri mənimsəyir və Azərbaycanın rəsmi təhsil strategiyasına sadiqliyimizi ifadə edirik. Məqsədimiz yalnız və yalnız gələcək nəsillərimizin mütərəqqi dəyərlərlə yetişdirilməsidir. "Araz" kursları həmişə bizimlə rəqabətdə olmuş və heç bir zaman onunla birgə fəaliyyət proqramımız olmamışdır".

Xatırladaq ki, bir müddət öncə "Araz" kurslarının bağlanması ilə nurçuların yeni adlar, o cümlədən "Zirvə" adı altında fəaliyyətlərini genişləndirdikləri barədə məlumat yayılmışdı.