Millət vəkili Qənirə Paşayeva İstanbulda “Bultürk” dərnəyinin dəstəyilə keçirilən “Türk dünyasında qadın” adlı konfransda iştirak edib.

Axar.az xəbər verir ki, millət vəkili türk dünyasının müxtəlif ölkələrindən gələn fəal qadınların iştirak etdiyi tədbirdə qadınların həyatın bütün sahələrində kişilərlə bərabərliyinin təmin olunması istiqamətində ciddi işlər görüldüyünü deyib.

Q.Paşayeva Azərbaycanda bu istiqamətdə həyata keçirilən dövlət siyasəti, əldə edilən uğurlar və həllini gözləyən problemlər barədə də ətraflı məlumat verib:

“Qadınlar əsasən təhsil, mədəniyyət, səhiyyə və sosial müdafiə kimi sahələrdə üstünlük təşkil edirlər. Lakin son illər qadınların həm də siyasi və ictimai qərar qəbuletmə səviyyəsində iştirakı artıb və artmaqda davam edir”.

Q.Paşayeva çıxışı zamanı Azərbaycanın və türk dünyasının ən böyük problemlərindən olan Qarabağ problemindən, ermənilərin törətdiyi soyqırımlardan, əsir və girov götürülmüş azərbaycanlılardan da danışıb.

Deputat vurğulayıb ki, Ermənistan BMT Təhlükəsizlik Şurası da daxil olmaqla, beynəlxalq təşkilatların qətnamələrinə məhəl qoymur.

Millət vəkili sonda türk kökənli insanların yaşadığı ağrılardan, əziyyət çəkdiyi problemlərdən də söz açıb.