Sabirabadda bostandan alınan yemişin 1 kiloqramı 10-12 qəpikdir.

Axar.az xəbər verir ki, bunu paytaxtda yemişin qiymətinin baha olmasına münasibət bildirən Kənd Təsərrüfatı Nazirliyinin mətbuat katibi Vüqar Hüseynov qeyd edib. O bildirib ki, alverçilər bostandan 10 qəpiyə aldıqları yemişi paytaxtda 1.50 manata satır:

“Fermerlər sahədən topdan məhsul alanların, yəni alverçilərin Bakıda yemişin 1 kiloqramını 25 qəpikdən satdıqlarını deyərək, 8 ay əziyyət çəkib məhsul yetişdirmiş kəndlidən məhsulu daha ucuz satmağı tələb etdiyini bildirirlər. Yəni, alverçi, vasitəçi dediyimiz zümrə o 1-2 qəpiyi də fermerə çox görür. Üstəlik özlərinin yaratdığı bahalığı yazıq fermerin boynuna ataraq, "sahədən baha almışıq, ona görə baha satırıq" deyib kəndlinin günahına girirlər”.

Nazirlik rəsmisi Sabirabadın Sərxanbəyli kəndindən cəmi 80 kilometr məsafədə, Bakı-Qazax magistral yolunun kənarında fəaliyyət göstərən marketin qarşısında çəkdiyi fotonu da paylaşıb:

“Fermerdən 10 qəpiyə aldıqları yemişi 55 qəpiyə satırlar. Paytaxt supermarketlərində fermerdən 10 qəpiyə alınan yemiş isə alıcılara 1 manata, manat yarıma satılır. Fermerin əməyinə yazıq”.