22:03

Hazırda koronavirus infeksiyası ilə bağlı tendensiya arzuolunan deyil. Burada gizli bir şey yoxdur.

Axar.az xəbər verir ki, bunu Nazirlər Kabinetinin Mətbuat Xidmətinin rəhbəri İbrahim Məmmədov Real TV-nin efirində deyib.

O qeyd edib ki, hazırda yoluxanların sayı sağalanların sayından çoxdur:

“Bu gün 6 nəfər sağalıb - bu, kiçik də olsa, yaxşı xəbərdir - amma yoluxma 43 nəfərdir və həndəsi silsilə ilə artır. Nə qədər ki, bu tendensiya davam edəcək, bu, bizim mənfi istiqamətdə getməyimiz deməkdir; o zamana qədər ki, biz yoluxmanın pik həddinə çatdığını və artıq yoluxmanun arta-arta getmədiyini görəcəyik”.

Nazirlər Kabinetinin sözçüsü bildirib ki, əgər hər kəs qaydalara riayət edərsə, evdə qalmalı olanlar evdə qalarsa və ən zəruri hallarda küçəyə çıxarlarsa, nəzarətsiz yerlərdə belə insanlar özlərini qoruyarlarsa, azalma prosesi gedər:

"Ümid edirik ki, aprelin 20-dək qoyulan karantin rejimi müddətində bizdə də dönüş nöqtəsi başlayacaq. Dönüş nöqtəsi başlayandan sonra da artıq bu məhdudiyyətlər də tədricən yumşaldıla bilər”.