Bakının Buzovna qəsəbəsinin Ordubadi küçəsindəki yarıuçulmuş bina Azərbaycan Gözdən Əlillər Cəmiyyətinin balasındadır.

Bu barədə Axar.az-a Xəzər rayon İH-nin İctimai-siyasi və humanitar məsələlər şöbəsinin müdiri Gülbala Qurbanov deyib.

“Sonradan həmin bina istifadə olunmadı. Heç Əlillər Cəmiyyəti üçün yeni bina da tikilmədi. Ora Əziz bəy adlı şəxsin evi olub. Binanın yarısı artıq sökülüb. Lakin bərpa olunması barədə bir məlumatımız yoxdur. Çünki bina Gözdən Əlillər Cəmiyyətinə aiddir”, - G.Qurbanov bildirib.

Məsələ ilə bağlı saytımıza açıqlama verən Gözdən Əlillər Cəmiyyətinin sədri Səmyar Abdullayev bildirib ki, binanın sökülüb təmir olunması üçün cəmiyyətin maddi imkanı yoxdur:

“Həmin ərazidə vaxtilə qaçqınlar məskunlaşmışdılar. Müvafiq qurumlara müraciət olunmuşdu ki, gələcəkdə yeni layihə həyata keçirək. Lakin maddi vəziyyətimiz buna imkan vermədi. Bu gün əraziyə gedib vəziyyətlə bağlı yenidən baxış keçirəcəyik. Müvafiq dövlət qurumlarına müraciət edəcəyik”.

Qeyd edək ki, Azərbaycanın Macarıstandakı sabiq səfiri Vilayət Quliyev Buzovna qəsəbəsinin Ordubadi küçəsində dağılmış halda olan bina ilə bağlı paylaşım etmişdi. Səfir binanın hər an uçmaq təhlükəsi olduğunu qeyd edərək, sahəyə sahib çıxılmaması ilə bağlı iradını bildirmişdi.