Dövlət Təhlükəsizlik Xidməti tərəfindən Müdafiə Nazirliyində əməliyyat keçirildi. Çox utancverici bir hadisə baş verdi. Zəfərdən, ölkə Prezidentinin Azərbaycanın torpaqlarının azad edilməsi istiqamətində atdığı möhtəşəm addımlardan sonra məlum oldu ki, qələbənin nəticələrini pul formasında MN xımır-xımır yeyirmiş.
Axar.az xəbər verir ki, bu sözləri millət vəkili Fazil Mustafa Parlamentin bu gün keçirilən iclasında deyib.
“Orta mərhələdə 10 milyondan çox yeyinti vardı. Yuxarı mərhələdə yəqin ki, bu rəqəm 100 milyonlarladır. Bu hadisə bizə nəyi göstərir? Tərtər hadisələrinin də bu gün yenidən istintaqa qaytarılması və üzərində iş aparılması onu deyir ki, nəzarətsiz təhlükəsizlik və müdafiə orqanlarının olması ölkənin gələcəyi üçün böyük problemlər yarada bilər”.
Millət vəkili bildirib ki, buna görə də parlament nəzarəti mexanizmi üzərində ciddi düşünülməlidir:
“Tərtər hadisələrində yüzlərlə insan faciə yaşayandan sonra biz onlara bəraət verilməsi ilə sevinirik. Amma bu bəraət onların həyatında nəyi dəyişəcək? Ailəsinin sınıdırlmış həyatını yenidən bərpa edə biləcəkmi? Yox! Ona görə də indidən bu məsələ barədə düşünməliyik. Parlament nəzarəti mexanizmini qurmalıyıq ki, vaxtında bu hadisələrin qarşısı alına bilsin. Müdafiə Nazirliyində yeyilən 10 milyon Mədəniyyət Nazirliyində, başqa yerlədə yeyilən vəsait deyil. Bu yeyilən bir şəhidin, qazinin qan puludur. Sabah bunların qarşısında cavab vermək üçün parlament, dövlət və cəmiyyət olaraq bu məsələnin üzərinə ciddi şəkildə getməliyik. Bunun məsuliyyətini daşıyanların mütləq məhkəmə qarşısına çıxarılmasını təmin etməliyik. Azad insanlar görsünlər ki, Ordu müqəddəs yerdir. Burada belə haramzada işlərlə məşğul olmaq olmaz”.