Ola bilər ki, hazırda bazarda olan məhsul yerli istehsal deyil. Çünki bizdə mövsüm meyvə-tərəvəzləri may ayında yetişməyə başlayır. Həmin vaxt məhsul bolluğu artır, təklif çoxalır və qiymət də buna uyğun formalaşır.

Bu sözləri Axar.az açıqlamasında iqtisadçı Ruslan Atakişiyev mövsüm meyvə və tərəvəzlərinin bahalığı ilə bağlı danışarkən deyib.

İqtisadçı qeyd edib ki, indiki dövrdə məhsulların bazara az çıxmasının bir neçə səbəbi var:

“Bəzən məhsulların keyfiyyəti zəif olur, ona görə də qurudularaq saxlanılır. Bu məhsullar xüsusi qablaşdırmada qorunur və mövsüm olmayan dövrlərdə satışa çıxarılır. Rusiyaya və digər xarici bazarlara satış gücləndikdə də daxili bazarda məhsul azalır və bu da qiymət artımına səbəb olur”.

Ekspertin fikrincə, məhsulun qiymətinin artmasına təsir edən əsas amillərdən biri də vasitəçilərin çoxluğudur:

“Məhsul istehsalçısından son alıcıya çatanadək arada çox sayda vasitəçi olur. Məsələn, kəndli bir məhsulu bir qiymətə satır, kənddəki alıcı onu topdan alır və Bakıya göndərir. Bakıya çatan məhsulu şəhərdəki alıcı topdan alır və onu pərakəndə satıcılara satır. Bu prosesdə azı 3 vasitəçi olur. Bu da məhsulun qiymətini artırır”.

Qeyd edək ki, qiymət fərqləri bölgələrə və satış məntəqələrinə görə dəyişir.