Təhlillərimiz onu göstərir ki, “Qlobal" Media Qrupuna məxsus olan media qrumlarına hücumlar Rusiyaya məxsus qruplar tərəfindən həyata keçirilib.

Axar.az xəbər verir ki, bunu parlamentin Xarici müdaxilələrə və hibrid təhdidlərə qarşı müvvəqəti komissiyasının sədri Ramid Namazov Milli Məclisin “Azərbaycanın media resurslarına kiberhücumlar” mövzusunda keçirilən ictimai müzakirəsində deyib.

O bildirib ki, hücumlar ilk dəfə Baku TV-yə edilib:

"Nəticədə, veb-server məlumatları və ehtiyat nüsxələr silinmiş, media resursları məhv edilmiş, infrastruktura giriş məhdudlaşdırılıb. Hücum zamanı istifadə edilən IP ünvanları və domenlər müəyyən edilmişdir. Kiberhücumlar APT28 və APT29 adlı kibercasus qrupları tərəfindən həyata keçirilib. Hücumlara ölkədaxili IP-lərdən də dəstək verildiyi müşahidə olunurdu. Hətta onlardan bəzilərinin ölkə ərazisində hotellərdə olduğunu müəyyən etdik. Ancaq onlar Azərbaycan vətəndaşı deyildilər. Ümumi hücumları Rusiyaya bağlı qruplar etmişdi. Onlar yalançı bayraqlardan istifadə edərək, fikir yayındırmağa çalışırdılar. Təəssüf ki, bu da Azərbaycan Rusiya arasındakı əlaqələrə kölgə salırdı".