"Avtoməsləhət" layihəsində

Bəzi sürücülər öz əlləri ilə öz avtomobillərinin ömrünü kəsirlər.

Bu haqda Axar.az-a əksər sürücüləri narahat edən mühərrik və motorxana sisteminin yuyulmasının nə dərəcədə lazımlı olması və hansı fəsadlara yol aça biləcəyi mövzusunda danışarkən avtomobil mütəxəssisi Şahin Qasımov deyib:

"Motorxananı yumaq olarmı? Bunun müsbət və mənfi tərəfləri hansılardır? Bu tip suallarla demək olar ki, hər gün qarşılaşıram.

Əvvəlcə onu deyim ki, avtomobilin elektronika sistemi iki şeydən zərər görə bilər.

1.Kəskin-yüksək temperatur
2.Müxtəlif hissələrin su ilə təması.

Ümumilikdə isə avtomobildən düzgün istifadə edilməməsi və yaxud avtomobilin öz istismar müddətini, resursunu bitirməsi böyük xərclərə yol aça bilər.

Lakin bəzi sürücülər öz əlləri ilə öz avtomobillərinin ömrünü kəsirlər. Bəzi insanlar avtomobillərinin motorxanasını avto-yuma məntəqələrində böyük təzyiqli su ilə yudurtdurur. Onlar bu işin hansı fəsadlara yol açacağını bilsələr, qətiyyən belə bir addım atmazlar. Avtomobilin motorxanasını təzyiqli su ilə yudurtmaq eyni ilə onu çaya atmaq kimi bir şeydir. Təsəvvür edin ki, 10-20 metr dərinliyi olan su hövzəsində 10-20 atmosfer su təzyiqi olur. Avto-yuma məntəqələrindəki suyun təzyiqi də bu atmosferlə eynidir.

İstər avtomobil yeni olsun, istər köhnə, mühərrikin təzyiqli su ilə təması qətiyyən yolverilməzdir. Bu prosesdə mühərrik sisteminin yuyulması üçün xüsusi mayelər var, onlardan istifadə edilən təqdirdə motorxananı yumaq olar. Hətta bu halda da suyun təzyiqindən istifadə etmək olmaz.

Müasir avtomobillərin 70 faizindən çox hissəsi elektronika ilə idarə olunur. Məsələn, son model bir avtomobildə 100-dən çox idarəetmə bloku, 100-200 arası sensor, rele, steker və digər elektronik hissələr mövcuddur. Bu hissələr biri-biri ilə əlaqəli şəkildə işləyərək ümumi uzunluğunu bir neçə km olan naqillərlə birləşir. Motorxana yuyulduqda isə həmin hissələrdə korroziyadan tutmuş qısaqapanmaya qədər hər şey baş verir. Adətən sürücülər motorxana yuyulduqdan dərhal sonra bunu hiss etmir. Bu proses 3-15 gün ərzində baş verir və sistemlər arası əlaqə pozulmağa başlayır. Nəticədə elektronika sistemi iflic olur. Bir blokun qiymətini 500 manatdan hesablasaq 7 blokun qiyməti və proqram təminatı sürücüyə 5000 manatdan baha başa gələ bilər. Hətta bunların dəyişilməsindən sonra digər elektronik sistemlərin də nasaz duruma düşmək ehtimalı istisna deyil. Buna isə istehsalçı da zəmanət vermir.

Qısası, motorxananın mühərrik ətrafına yığılan tozlardan təmizlənməsi vacib olsa da, onu avto-yuma məntəqələrində təzyiqli su ilə bir dəfə yudurtmaq sürücüyə bu qədər maddi ziyan vura bilər. Bu prosesin aparılması üçün xüsusi mayelərdən istifadə zəruridir".