Mütəşəkkil Cinayətkarlıqla Mübarizə Baş İdarəsində aparılan istintaqla bağlı daha bir məqam üzə çıxıb.

Axar.az xəbər verir ki, istintaqda adı hallanmamasına baxmayaraq, əməkdaşları barədə araşdırma aparılan Abşeron rayon Polis Şöbəsinin Mehdiabad polis bölməsinin rəisi Eldar Qazıbəyov haqqında qərar verilib. Belə ki, Daxili İşlər naziri Ramil Usubovun müvafiq əmri ilə polis bölməsinin rəisi E.Qazıbəyov "xidmətə yararsız" hesab edilib. Qeyd edək ki, bu, polis orqanlarında ən ağır cəza sayılır və bu cəzanı almış şəxsin təkcə vəzifədən deyil, polis sıralarından çıxarılması məsələsi müzakirə mövzusudur.

Daha bir məlumat isə Abşeron PŞ-nin İctimai Təhlükəsizlik bölməsinin rəisi Zülfüqar Məmmədovla bağlıdır. Mütəşəkkil Cinayətkarlıqla Mübarizə Baş İdarəsinə daxil olan şikayət təsdiqini tapmadığı üçün barəsində aparılan araşdırmaya xitam verilməsinə baxmayaraq, Zülfüqar Məmmədov da şiddətli töhmət alıb.

E.Qazıbəyov Axar.az-a açıqlamasında Mütəşəkkil Cinayətkarlıqla Mübarizə Baş İdarəsində aparılan araşdırmanın səbəbinə toxunmayıb. Yalnız MCMBİ-iə dəvət edilmədiyini və ifadəsinin alınmadığını bildirib:

"Mən Baş İdarəyə dəvət olunmamışam və ifadə də verməmişəm. Haqqımda verilən qərarla bağlı isə bu barədə rəhbərlikdən mənə heç nə deyilməyib".

Qeyd edək ki, oktyabrın 10-da Abşeron PŞ-nin İctimai Təhlükəsizlik bölməsinin rəisi Zülfüqar Məmmədov, Mehdiabad polis bölməsinin rəis müavini Şükür Paşayev və baş əməliyyat müvəkkili Təvəkkül Cəbrayılovun Mütəşəkkil Cinayətkarlıqla Mübarizə Baş İdarəsinə çağırıldığı barədə məlumat yaymışdıq. Hər üç polis əməkdaşından müxtəlif səviyyəli şikayətlər olduğu deyilirdi.

Abşeron RPŞ İctimai Təhlükəsizlik bölməsinin rəisi Z.Məmmədov barədə şikayət təsdiqini tapmadığı üçün araşdırmaya xitam verilsə də, digər iki əməkdaşla bağlı istintaq davam etdirilir. Ötən gün cənab nazirin sərəncamı ilə barələrində istintaq aparılan hər iki polis əməkdaşı araşdırmanın obyektivliyini təmin etmək məqsədi ilə vəzifədən çıxarılıb və sərəncama götürülüblər.

Bu gün isə əməkdaşları barədə araşdırma aparılan Mehdiabad polis bölməsinin rəisi işdən azad edilib, Abşeron RPŞ-nin İctimai Təhlükəsizlik bölməsinin rəisi Z.Məmmədov isə şiddətli töhmət alıb.