Qənirə Paşayeva AŞPA-da "Büronun inkişaf qətnaməsi"nin müzakirəsi zamanı ön cəbhədə baş verən son hadisələrlə bağlı Azərbaycana qarşı ittihamlarla çıxış edən erməni deputat Samvel Farmanyana sərt cavab verib.

Axar.az xəbər verir ki, millət vəkili Ermənistan heyəti adına AŞPA-da çıxış edən S.Farmanyanın həqiqətə uyğun olmayan açıqlamalar verərək dünya ictimaiyyətini yanıltmağa çalışdığını deyib.

"Mən burada başqa bir çıxış edəcəkdim. Terrora qarşı birgə mübarizəmizin gücləndirilməsinin önəmi və mədəniyyətlərarası dialoqun genişlənməsindən danışacaqdım. Amma Ermənistan nümayəndə heyətinin üzvü Samvel Farmanyanın ölkəm əleyhinə söylədiyi yalan və ittihamlara cavab vermək, gerçəkləri sizə çatdırmaq istəyirəm. Mən sizlərə işgalçı Ermənistan hərbçilərinin anasının gözləri önündə qətl etdiyi 16 yaşındakı Turanə Həsənlinin anasının, oğlunun gözləri önündə qətl edilən Dadaşov Qaraşın ailəsinin çağrışlarını səsləndirmək istəyirəm. Apreldə Ermənistan atəşkəsi pozaraq mülki azərbaycanlıları, kəndlərı hədəfə alaraq bir neçə vətəndaşımızı qətl edib, çoxlu sayda evləri dağıdıb. Əlimizdə bunu sübut edən foto və videolar var", - deyə o, qeyd edib.

Millət vəkili əlavə edib ki, Azərbaycan-Ermənistan arasında yaşanan son olaylar, iki ölkənin sərhədində deyil, Ermənistanın işğal etdiyi Azərbaycan torpaqlarında baş verib:

"Bu müharibədə həlak olan Azərbaycan əsgərləri, hərbiçiləri öz torpaqlarını qoruyurdu. Farmanyandan soruşun ki, erməni əsgərlərinin Azərbaycan torpaqlarında nə işi vardı? Farmanyanın Qarabağ problemi ilə bağlı mövqeyinə, AŞPA prezidenti Pedro Aqramunta qarşı səsləndirdiyi ittihamlara kəskin etiraz edirəm. AŞPA prezidenti ədalətin yanında olaraq bu problemin həllinə, işğalın bitməsinə çağırır. Biz Assambleyamızı bu məsələyə daha çox diqqət ayırmağa və işğalçı Ermənistana təzyiq etməyə çağırırıq".