2016-cı ilin dövlət büdcəsinə dəyişiklərin müzakirəsi zamanı üç əsas sahənin inkişafı qarşıya əsas prioritet olaraq qoyulub.

Bu sözləri Axar.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov yeni dövlət büdcəsini qiymətləndirərkən deyib. Millət vəkili bildirib ki, büdcədə əsas dəyişikliklər milli valyutanın iki dəfə dəyərdən düşməsi ilə bağlıdır:

"Dövlət büdcəsi təsdiqlənəndə neftin qiyməti 50 dollar idi. Ancaq hazırda 30 dollar ətrafındadır. Ona görə də büdcə dəyişikliklərində neftin qiymətini 25 dollardan götürdük. Dövlət büdcəsinin gəlir və xərclər hissəsinə 2,3 milyard manat əlavə vəsait daxil olacaq. Bunun 1,6 milyardı Dövlət Neft Fondundan transfer, 700 milyonu isə əlavə dəyər, fiziki və hüquqi şəxslərdən gəlir vergisi və digər vergilər hesabına formalaşacaq.

Xərc hissəsində sözügedən vəsaitin 800 milyonu sosial müdafiə xərcləridir. Bura əsasən əmək haqqı, pensiya, sosial müavinət və yardımlar daxildir. 400 milyon manat müdafiə, təxminən 525 milyon manat isə dövlət borcu ilə əlaqədar ayrılan vəsaitlərdir. 200 milyona yaxın vəsait isə səhiyyə və təhsil xərclərinə ayrılıb. Bununla bərabər, dövlət büdcəsinin müzakirəsi zamanı üç əsas məsələ çox ciddi şəkildə qarşıya əsas prioritet olaraq qoyuldu. Bunlar kənd təsərrüfatı, tikinti sektoru, kiçik və orta sahibkarlığın inkişaf etdirilməsidir. Tikinti sektoruna köməklik etməklə ipoteka kreditləri vasitəsilə insanların ev almasının təmini məsələsi gündəmdə olacaq".

Qeyd edək ki, fevralın 23-də Milli Məclis "Azərbaycan Respublikasının 2016-cı il dövlət büdcəsi haqqında" qanuna edilən dəyişiklikləri təsdiqləyib. Son dəyişikliklərdən sonra dövlət büdcəsinin gəlirləri 16 milyard 822 milyon manat, xərcləri isə 18 milyard 495 milyon manat nəzərdə tutulub. Büdcədə neftin satış qiyməti 25 dollar səviyyəsində götürülüb.