İndoneziyanın Qərbi Yava əyalətində yerləşən Qununq Padanq təpəliyi illərdir sönmüş vulkan hesab olunurdu. Lakin aparılan son araşdırmalar bu təpənin əslində insan əli ilə tikilmiş nəhəng bir piramida ola biləcəyini və Misir piramidalarından minlərlə il daha qədim olduğunu ortaya qoyur.

Axar.az Milli.az-a istinadən xəbər verir ki, karbon testləri Qununq Padanqın ən qədim qatlarının 16.000 - 27.000 il əvvələ aid olduğunu göstərir.

Müqayisə üçün: Misir piramidaları təxminən 4.500 il əvvəl tikilib.

Tədqiqatlar göstərir ki, struktur fərqli dövrlərdə üst-üstə tikilib. Ən alt qat təbii vulkanik lavanın insanlar tərəfindən formaya salınması ilə yaradılıb.

İnsan əli, yoxsa təbiət?

Geoloqların bir qismi bunun tamamilə təbii bir təpə olduğunu müdafiə edərkən, arxeoloq Dani Hilman Natawidjaja və komandası radar görüntüləri ilə daxildə gizli otaqların və simmetrik sütunların olduğunu iddia edir.

Əgər bu tapıntılar rəsmən təsdiqlənərsə, bu, son buz dövründə bizim bildiyimizdən daha inkişaf etmiş bir sivilizasiyanın mövcud olduğu mənasına gələcək.

Bir çox alim bu iddialara şübhə ilə yanaşır. Onların fikrincə, 20.000 il əvvəlki ovçu-yığıcı cəmiyyətlərin belə nəhəng memarlıq layihəsini həyata keçirmək üçün lazımi alətləri və təşkilati quruluşu olmayıb.