Argentinalı futbolçular dünya çempionatının yarımfinal mərhələsində İngiltərə üzərində 2:1 hesablı qələbədən sonra “Folklend (Malvin) adaları Argentinaya məxsusdur” banneri qaldırıblar.

Axar.az xəbər verir ki, bu barədə "Döyçe Velle" nəşri məlumat yayıb.

Məlumata görə, bannerin haradan gətirildiyi məlum olmasa da, onun daha əvvəl tribunada nümayiş etdirildiyi bildirilib.

Bannerlə bağlı sualı cavablandıran Argentina yığmasının yarımmüdafiəçisi Leandro Paredes deyib ki, oralar həmişə Argentinaya məxsus olacaq:

“Bu oyunun ölkəmiz üçün nə ifadə etdiyini bilirdik. Tariximizin o kədərli dövrünü yaşamış insanları layiqincə təmsil etməyə çalışdıq ki, onlar özlərini bizimlə eyniləşdirə bilsinlər və biz də müsbət mesaj verə bilək”.

Sözügedən banner FİFA-nın turnir təşkilatçıları tərəfindən tətbiq edilən “Stadion Davranış Qaydaları”nı poza bilər. Həmin qaydalara əsasən, siyasi, təhqiredici və ya ayrı-seçkilik xarakteri daşıyan banner, bayraq, vərəqə, geyim və digər atributların stadionda nümayiş etdirilməsi qadağandır.

FİFA-nın məsələ ilə bağlı araşdırlamalara başladığı bildirilib.

Qeyd edək ki, İngiltərənin banneri qaldıran 5 argentinalı futbolçunun - Kuti Romero (“Tottenhem”), Lisandro Martinez (“Mançester Yunayted”), Enzo Fernandes (“Çelsi”), Aleksis Mak Allister (“Liverpul”) və El Kolo Barkonun (“Çelsi”) iş icazəsini ləğv edəcəyi gözlənilir.