ABŞ Dövlət Departamentinin sabiq rəhbəri Kolin Pauellin köməkçisi polkovnik Lourens Vilkerson Ukrayna böhranında əsl günahkarın ABŞ, xüsusilə də Bill Klinton olduğunu açıqlayıb.

Axar.az xəbər verir ki, "Baltkom" radiosuna danışan polkovnik Ağ Ev rəhbərliyinin vaxtında NATO-nun Şərqə doğru genişlənməsinə mane olmalı olduğunu qeyd edib:

"Məncə, ABŞ-ın günahı digər ölkələrdən daha böyükdür. Sabiq prezident Bill Klinton 1993-1994-cü illərdə atdığı addımlarla ABŞ Dövlət Departamentinin rəhbəri Ceyms Beyker və SSRİ Xarici İşlər naziri Eduard Şevardnadzenin imzaladığı müqaviləni pozdu. Klinton NATO-ya potensial üzvlər ilə hərbi manevr etmə icazəsi verərək çərçivə xaricinə çıxdı. Yəni Klinton Moskvanın gözünə barmaq saldı".

70 yaşlı siyasətçinin fikrincə, Bill Klinton rəhbərliyinin atdığı addımlar Moskva və Vaşinqton arasında bu gün hələ də davam edən və Ukraynada qarşıdurmayla nəticələnən gərginliyə yol açıb:

"Köhnə Sovet ölkələri olan Latviya, Litva və Estoniya 2004-ci ildə NATO-nun üzvü oldu. Ukrayna və Gürcüstanın da hədəfi İttifaqa tam üzv olmaqdır. NATO Şərqi Avropadakı hərbi gücünü artırır. Moskva rəhbərliyi NATO-nun öz sərhədlərinə doğru genişlənməsini milli, regional və qlobal bir təhdid olaraq qəbul edir".