Uzunmüddətli qanlı münaqişədən sonra Azərbaycan və Ermənistan arasında sülh bərqrəar olub.

Axar.az Teleqraf-a istinadla xəbər verir ki, bunu Ermənistan xarici işlər naziri Ararat Mirzoyan deyib.

Ermənistanın baş diplomatı artıq sülhün vaxtının gəldiyini vurğulayıb.

“Ermənistan və Azərbaycan arasında sülh bərqərar olub, bu, uzun illər davam edən qan tökülməsi, zorakılıq, insan tələfatı, köçkünlük və dərin travmalarla dolu münaqişəyə son qoydu. Hazırda hər iki ölkə barışığın çətin yolundan keçərək sülhü institusional əsasda möhkəmləndirmək və münasibətləri tənzimləmək üzərində çalışır”, - Mirzoyan qeyd edib.

Xarici işlər naziri əlavə edib ki, bölgə insanları keçdikləri çətinliklərin fərqindədir:

“Əsas odur ki, bu gün bərqərar olan sülh vasitəsilə gələcəkdə bu cür çətinlikləri, itkiləri aradan qaldırmağa və qarşısını almağa çalışırıq. Bu itkilərin qarşısının alınmasının açarı - yeganə yolu sülhdür”.