Prezident İlham Əliyevin sərəncamı ilə Südabə Cümşüd qızı Həsənova “Əməkdar hüquqşünas” fəxri adına layiq görülüb.

Axar.az xatırladır ki, Südabə Həsənova 1947-ci ildə Naxçıvan MR-nin Şərur rayonunda anadan olub. 1971-ci ildə Azərbaycan Dövlət Universitetinin hüquq fakültəsini bitirib.

Azərbaycan SSR Ədliyyə Nazirliyinin Məhkəmə Orqanları İdarəsində məsləhətçi, Bakı şəhər Binəqədi rayon məhkəməsinin hakimi (1973-79) işləyib.

1979-cu ildə S.Həsənova Bakı Şəhər Məhkəməsinin və onun Rəyasət Heyətinin, 1980-cı ilin 27 martında Azərbaycan SSR Ali Məhkəməsinin və onun Rəyasət Heyyətinin üzvü seçilib, Ali Məhkəmənin intizam kollegiyasının sədri olub.

S.Həsənova 1987-ci ilin aprel ayında Azərbaycan Respublikası Ədliyyə nazirinin 1-ci müavini vəzifəsinə təyin olunub.

1995-1998-ci illərdə Azərbaycan Respublikasının Ədliyyə naziri vəzifəsini icra edib. 1998-ci il 10 yanvar tarixdə Azərbaycan Respublikasının Ədliyyə naziri təyin edilib.

2000-2005-ci illərdə Ali Məhkəmənin sədri işləyib. 2005-ci ilin 19 aprelindən sədr vəzifəsindən azad edilib.
2005-ci ildən indiyədən Konstitusiya Məhkəməsinin hakimidir.

5 fevral 2007-ci ildə “Şöhrət” ordeni ilə təltif edilib.