Sağlamlığıni itirən şəxslərin maddi təminatı sahəsində hökumətin həyata keçirdiyi tədbirlər yerli məmurların səriştəsizliyi üzündən ünvanına gedib çatmır.

Xəzər rayonu Binə qəsəbəsi Hövsan Südçülük Sovxozunda yaşayan 1-ci qrup əlil Quliyev Rafail Ağamir oğlu İcra Hakimiyyəti rəsmilərinin onu aldatdığını iddia edir.

"Axar.az"a açıqlamasında R.Quliyev bildirib ki, mənzil şəraitinin yaxşılaşdırılması ilə bağlı bu il bir neçə dəfə Prezident Administrasiyasına müraciət edib:

"Bunun nəticəsi olaraq 2013-cu il iyunun 13-də Xəzər rayon icra başçısının müavini Vaqif Həsənov, Binə qəsəbə nümayəndəsi və bələdiyyəsinin sədr müavinləri bizə gəldilər. Ailə vəziyyətimlə, yaşayış şəraitimlə tanış oldular. 7 nəfərlik ailə ilə bir otaqlı evdə qalırıq. Yağış yağanda bütün sular evimizə dolur. Vaqif Həsənov da acınacaqlı vəziyyətdə yaşadığımızı gördü və bizə əlavə bir otaq tikdirəcəklərinə, mövcud olan otağı isə təmir etdirərək yaşamaq üçün yararlı vəziyyətə gətirəcəklərinə söz verdilər".

Ailəsinin çətin vəziyyətdə, ciddi maddi ehtiyaclar içərisində yaşadığını deyən R.Quliyevi icra rəsmilərinin gəlişi çox sevindirib:

"Həmin gün bir maşın mişar daşı, 20 kisə sement , 10 ədəd şifer gətirdilər. Qalan lazımi tikinti materiallarını da gətizdirəcəklərini söylədilər. Bu məni çox sevindirdi. Fikirləşdim ki, mənə xeyirxahlıq edirlər, yəqin davamı da olacaq və otağı tikəcəklər. Mənə dedilər ki, Prezident Administrasiyasından bu məsələ ilə maraqlanırlar. Onlara məlimat vermək üçün İcra Hakimiyyətinin mənim xahişimi yerinə yetirdiyi barədə razılıq ərizəsi yazmağımı istədilər. Mən də onlara inanıb ərizəni qabaqcadan imzaladım. O vaxtdan icra hakimiyyətinin nümayəndələrinin heç birini görə bilmirəm. Zənglərimə də cavab vermirlər. Evi tikməyə isə heç bir imkanım yoxdur. Heç olmasa usta pulunu da vermədilər ki, özüm birtəhər tikdirim".

Qeyd edək ki, R.Quliyev xəstəliyinə görə 1999-cu ildə III qrup əlil statusu alıb. 2009-cu ildə yıxılaraq aldığı travma nəticəsində onurğasında ciddi fəsadlar yaranıb və ayaqlarını itirib. Hazırda I qrup əlil olan R.Quliyev yalnız araba ilə hərəkət edə bilir. Ailəsinin isə onun aldığı 185 manat pensiyadan əlavə gəliri yoxdur. Ona görə də böyük ailə ilə kiçik bir otaqda yararsız şəraitdə qalmaq məcburuyyətindədir. Xəzər Rayon İcra Hakimiyyətinin səlahiyyətliləri isə R.Quliyevin yazdığı razılıq ərizəsini əsas gətirərək ona kömək etməkdən imtina edirlər.

Məsələyə aydınlıq gətirmək üçün Xəzər rayon İcra Hakimiyyətinə müraciət etdik. Başçının müavini və bu məsələ ilə birbaşa məşğul olan Vaqif Həsənovla danışmaq cəhdlərimiz boşa çıxdı. İki gün ərzində onun telefonları ardıcıl olaraq susdu. Məcbur qalaraq İcra Hakimiyyətində mətbuat əlaqələndiricisi kimi tanınan Gülbala Qurbanovla əlaqə qurduq. Sualımızı çox aqressiv qarşılayan G.Qurbanov dedi:

"Xəzər rayon İcra Hakimiyyətində fərdi evlərin tikintisi nəzərdə tutulmur. Həmin adam material verildiyi üçün çox sağ ol desin".

Hazırda sözügedən saxta ərizənin etibarsızlaşdırılmasına çalışan R.Quliyev isə bu il noyabrın 25-i və 29-da yenidən Prezident Administrasiyasına müraciət edib.

Məsələni diqqətdə saxlayacağıq.