Xocalıda azı 3813 nəfər qətlə yetirilib. 613 nəfərin meyiti tapıldığı üçün bu rəqəm hallanır.

Axar.az xəbər verir ki, bu barədə Hərbi Jurnalistlər Birliyinin sədri, Azərbaycan Televiziya və Radio Verilişləri QSC-nin İnformasiya Proqramları studiyasının direktor müavini Tamxil Ziyəddinoğlu məlumat paylaşıb. O bildirib ki, ermənilər qətliamın miqyasını gizlətmək üçün meyitləri yandırıblar:

“Erməni faşistləri 2000 Xocalı sakininin izini itirmək üçün meyitləri ayrı-ayrı yerlərdə toplayıb yandırıblar. 1200 nəfəri isə bataqlığa töküb batırıblar. Bunu özləri etiraf edirlər... Bu yanlışlığı düzəltmək lazımdır. O zaman Xocalıda 10 min əhali yaşayırdı, hanı o əhali?”

Qeyd edək ki, rəsmi məlumata görə, Xocalıda ermənilər 613 nəfəri qətlə yetirib, meyitlər təhqir olunub, 1275 nəfər girov götürülüb. Onlardan 150 nəfərin taleyi hələ də məlum deyil. Qətlə yetirilənlərin 63 nəfəri uşaq, 106 nəfəri qadın, 70 nəfəri ahıl və qoca idi. Hərbi təcavüz nəticəsində 8 ailə tamamilə məhv edilib.