ABŞ-da yayımlanan ən məşhur şoulardan biri olan "Amerika istedad axtarır" (" America's Got Talent") verilişində çıxışını davam etdirən azərbaycanlı Üzeyir Novruzov bu gün növbəti dəfə səhnəyə çıxıb. Azərbaycanlı Çarlin Çaplin kimi tanınan Üzeyir bu dəfə də izləyiciləri heyrətləndirərək onların böyük rəğbətini qazana bilib. Belə ki, o, şouda indiyədək heç zaman səhnədə nümayiş etdirmədiyi nömrə ilə çıxış edib.

"Amerikanın səsi" xəbər verir ki, heç bir təhlükəsizlik tədbiri görülmədən təhlükəli hündürlükdə olan nərdivanın ən yuxarı pilləsində ayaq üstə dayanaraq izləyicilərə həyəcan dolu anlar yaşadıb.

Bu nömrəni daha da həyəcanlı edən şounun canlı yayımlanması olub. Həm münsiflər heyəti, həm də auditoriya Üzeyir Novruzovu ayaq üstə alqışlayıb. Çıxışa münasibət bildirən münsiflər heyətindən Hovard Stern Üzeyirin çıxışını izlərkən özünü Olimpiya Oyununda hiss etdiyini bildirib. O daha sonra televiziya tamaşaçılarını Üzeyirə səs verməyə çağırıb.

Nəzərinizə çatdıraq ki, artıq şounun bu mərhələsində növbəti şouya vəsiqə qazanacaq iştirakçıları münsiflər heyəti deyil, amerikalıların verdiyi səslər müəyyən edir.