Milli Məclisin Mədəniyyət Komitəsinin sədri Qənirə Paşayeva Xətai Sənət Mərkəzində keçirilən “Akvarel təəssüratları” adlı akvarel əsərlərindən ibarət satış sərgisində iştirak edib.

Axar.az xəbər verir ki, sərgi Azərbaycan Respublikası Milli Məclisinin Mədəniyyət Komitəsi, Mədəniyyət Nazirliyi, Rəssamlar İttifaqı, Dövlət Rəsm Qalereyası, Beynəlxalq Akvarel Cəmiyyətinin Azərbaycan nümayəndəliyi, “Avrasiya Beynəlxalq Araşdırmalar İnstitutu” İB, “Nəfəs” İB və Xətai Sənət Mərkəzinin nəzdindəki Xətai Akvarel Qalereyasının təşkilatçılığı ilə hazırlanıb.

Sərgi ölkəmizdə sulu boya sənətinin inkişafı, təbliği və bu sahədə çalışan rəssamların yaradıcılığının dəstəklənməsi məqsədilə Beynəlxalq Akvarel Cəmiyyətinin 10 illik yubileyinə həsr olunub.

Sərgidə 60-a yaxın suluboyaçı rəssam 80-ə qədər əsəri ilə təmsil olunub. Sonda əsəri sərgilənən rəssamlara hədiyyələr və sertifikatlar təqdim edilib.