Qənnadı məmulatları qida rasionumuzda geniş istifadə olunan yeyinti məhsullarından olduğuna görə istehlakı zamanı onların keyfiyyət və təhlükəsizlik göstəricilərinin qiymətləndirilməsinə diqqət etmək lazımdır.

Azərbaycan Respublikasının İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətindən Axar.az-a verilən məlumata görə, hazırlanmış hər növ qənnadı məmulatı saxlama şəraitini və saxlama müddətini göstərən sənədlərlə müşayiət olunmalıdır:

"Qənnadı məhsullarının qablaşdırılması məhsulun konkret çeşidi və normativ texniki sənədlərin tələblərinə uyğun olmalıdır. Bu məmulatlar əsasən içərisinə perqament kağızı sərilmiş taxta və karton yeşiklərə, qutu və sellofan paketlərə, çəki ilə satılanları isə qutu, plitka və kağıza qablaşdırılır. Qablaşdırılmayan məhsullar haqqında informasiya isə ticarət zalında məlumat vərəqində göstərilməlidir.

Realizə zamanı unlu qənnadı məmulatlarından olan və keyfiyyət göstəriciləri standartın tələblərinə cavab verən tort və pirojnaların forması düzgün, zədəsiz olmalı, dadı və iyi çeşidinə müvafiq olmalı, kənar iy və dad verməməlidir.

Şəkərli qənnadı məmulatları mürəbbə, cem, povidlo və s. şüşə və ya tənəkə bankalara qablaşdırılaraq satışa çıxarılır. Hər bir istehsalçı və satıcı bilməlidir ki, qablaşdırılmasında nöqsan olan qənnadı məmulatlarının satışı qadağandır".

Xatırladaq ki, bu kimi problemlərin aradan qaldırılması məqsədilə Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən vaxtaşırı monitorinq və yoxlamalar həyata keçirilir, mövcud olan problemlərin aradan qaldırılması istiqamətində tədbirlər görülür.