Mən Türkiyənin Qars şəhərindən gəlmişəm. Bura mənim ata yurdumdur. Ata babam Şuşa, ana babam isə Gəncə şəhərindəndir. 1918-ci ildə burada yaşanan erməni zülmü zamanı Türkiyəyə gediblər. Dünyadan köçənədək Azərbaycan deyə-deyə əzab çəkiblər. Bu gün mən onların həsrətini çəkdikləri bu yerləri həm də onlar üçün ziyarət edirəm.

Axar.az xəbər verir ki, bu sözləri Azərtac-a Şuşaya səfər edən türkiyəli din xadimi Əhməd Ərdəm (Ahmet Erdem) deyib.

"44 günlük Vətən müharibəsi zamanı biz Qarsdakı məsciddə hər zaman dualar edirdik, şəhidlərimizin xatirəsini ehtiramla anırdıq. Bugünkü səfərimiz zamanı ermənilərin Qarabağ da təkcə tikililəri və təbiəti deyil, insanlığı, bəşəri insanlıq hisslərini məhv etdiklərinin şahidi oldum. Düşünürəm ki, buradakı bu mənzərə, bu insanlıq cinayətinin qalıqları mütləq saxlanılmalı və dünyaya göstərilməlidir. Qoy bütün dünya bu vəhşiliyin nümunələrini real faktlarla görsün", - o bildirib.