Adətən dünyadakı hadisələr, siyasi böhranlar, savaşlar və ya gərginliklər baş xəbər olur. Hansı ölkədə siyasi gərginliklər var, harda daxili müharibələr gedir, hansı ölkə başqa bir ölkənin torpağını işğal etdi...

Gündəm bunlarla dəyişir, insanlar hər gün əlinə aldığı qəzetdə, kompüterini açıb oxuduğu xəbərlərdə ən çox bunlara diqqət edir. Doğurdan da siyasi aləmdə yaşanan hadisələrin yanında Bakıdakı ağacların qırılması axı elə də əhəmiyyətli xəbər deyil. Bəlkə də...

Amma düşünəndə ki, bu ağaclar məhvi təkcə ağac qırılması ilə qalmır, təkcə estetik məsələ deyil, birbaşa bizim səhhətimizin, ağ ciyərlərimizin qətlidir, onda mənzərə dəyişir. Məsələ ondadır ki, Bakının tozlu və boğuq havasından əziyyət çəkən insanı hələ də bu ağacların qırılmasını özünə, səhhətinə qarşı bir əməl kimi dəyərləndirmir, ya da bunu düşünüb, başını dərdə salmaq istəmir.

Bakıda oksigen normadan 28% aşağıdır. Çirklənməsi yuxarı olan bu şəhərdə, əslində, ağac olmaq işgəncədir, çünki Bakıda öz rəngini qoruyub saxlayan, şux yaşıl rəngdə gözə dəyən ağacı olsa-olsa ancaq Mərdəkan tərəflərdə görmək olar. Yadımdadır, yaxında Xırdalan tərəflərə düşdü yolum... Yol kənarında olan ağacların rənginə baxanda adamın canı sıxılır. Yaşıllıqdan əsər yoxdur, xəstə görünüşlü, tozdan boz rəng almış ağacların halı normal düşünə bilən birinin ürəyini ağrıdır. Yol kənarlarının qaydaya salınmaması, tıxacda maşınların bu tozlu yol kənarına çıxması, ya da küləkli havada toz-dumanın aləmi başına götürməsi Bakıdakı ağacların bəxtinə "boz" bağlayıb.

Bir necə həftə bundan əvvəl Botanika bağında ağacların qırılması ilə bağlı xəbərlər gəldi. Bu günsə bəlli oldu ki, az əvvəl xaricdən baha qiymətə gətirilib əkilən Bakı bulvarındakı ağaclara da, necə deyərlər, əl gəzdirilib. Daha sonra Bakı-Sumqayıt yolunda olan ağacların kəsilməsi ilə bağlı video yayıldı. Maraqlıdır, yaxşıca pul ödənib xaricdən gətirilmiş, kimsəyə lazım olmayan əliaçıqlıqla Bakı bulvarını bahalı ağaclarla bəzəyib sonra da o ağacları kəsməkdən hansı məntiqi nəticə çıxarmaq olar?! Təbii ki, ilk ağıla gələn o olur ki, yenisini əkəcəklər... Bunun da adı nədir, buna nə əməliyyatı deyilir?..

Aldığın ağacı başqa bir yerdə ək də!

Qəribədir ki, Bakı ətrafına da çıxırsan, yol boyu ağaclar əkilir. Hətta Mehdiabad qəsəbəsinə gedən yolun neftlə kirlənmiş torpaqlar olmasına baxmayaraq, orda da belə ağac əkiblər. Nə deyəsən, əhsən! Amma deyə bilmirsən. Çünki bu əkilən ağacın da taleyinə kəsilib atılmaq düşür.

Əgər bu ağaclar yaşıllaşdırma niyyəti ilə əkilirsə, niyə xaricdən – Azərbaycan təbiətinə uyğun olmayan bahalı ağaclar gətirilir? Niyə öz ağaclarımız becərilmir?

Son Türkiyə səfərimdə yol boyu olan meşə zolağında köhnəlib qırılan ağacların yerinə yenisinin əkilməsinə diqqət etdim. Yeni ağaclar bizdəki kimi taleyin axarına buraxılmır. Külək onları əyib yöndəmsiz, estetik baxımdan ürək sıxan hala gətirməsin deyə, məftillərlə sarılır. Bizdəsə Bakının belə küləkli olmasın baxmayaraq, əkilən nazik ağaclar küləyin qarşısında buraxılır, suvarılmır. Allahın yazığı gəlib yanmayan ağac da öz görkəmi, yöndəmsiz, qozbel halı ilə adamın ürəyini sıxmadan başqa heç nəyə yaramır…