Dünən Yevlaxda faciəvi hadisə baş verib. Doğuş zamanı
ana və uşaq dünyasını dəyişib. Səhiyyə nazirliyi hələ ki, araşdırma
aparıldığını bildirib. Ola bilsin ki, nazirlik adından nəsə
deyilsin. Bu cür faciəvi hallara münasibət həmişə elə olur ki,
sanki insan iradəsindən kənar, qeyri-ixtiyari bir qəza baş verib və
nəticədə də bədbəxt hadisə meydana gəlib.
Halbuki, heç bir həyati təhlükəsi olmayan xəstəliklərə və ya
tibbi əməliyyatlara görə ölkənin səhiyyə sistemi bütövlükdə
məsuliyyət daşıyır. Çünki səhlənkarlıq və ya qeyri-peşəkarlıq
üzündən əgər bir insanın həyatına son qoyulursa, bu, artıq
qatillik, insana qarşı vandal münasibətin nəticəsidir. Bu gün
mədəni saydığımız dünyada səhiyyənin məqsədi xəstəliklərin
yaranmasının qarşısını almaq, onu ilkin vaxtda aşkara çıxarıb
aradan qaldırmaqdır. Bu təkcə həkimlərin peşəkarlığı, dərmanların
keyfiyyətli olması məsələsi deyil, həm də səmərəli işləyən tibbi
sığorta sisteminin yaradılması ilə bağlıdır. Vətəndaşın
məsuliyyətliliyindən asılı olmayaraq tibbi sığorta şirkəti məyyən
etdiyi vaxtda öz müştərisinin qarşısında vaxtlı-vaxtında müayinə
olmaq şərti qoyur və beləcə, hər kəs bundan faydalanır. Ancaq
keçmiş sovet səhiyyəsinin mirasını daşıyan bu günkü səhiyyəmiz
xəstəliklərin qarşısını almaq məqsədi ilə deyil, insan
xəstələnəndən sonra onun müalicə etmək prinsipi əsasında fəaliyyət
göstərir.
Müalicə də ki, nə müalicə...
Bu yaxınlarda öyrəndim ki, İran bizim Biləsuvar keçid
məntəqəsinə yaxın ərazidə böyük xəstəxana kompleksi inşa etməyə
başlayıb. Məqsəd Azərbaycandan gələn xəstələri qəbul etməkdir.
Çünki bu sahədə sifarişlər o qədər böyükdür ki, artıq İran
hökumətinin diqqətini cəlb edib. Bu fakt bizi çox ciddi
düşündürməlidir. Səhiyyəmiz niyə bu qədər insanların nəzərində
etibar və güvənini itirib?
Çeşidili səbəblər var. Həkimlərin peşəkarlığının aşağı
olmasından tutmuş dərmanların keyfiyyətsizliyinə qədər çoxsaylı
məsələlərin hər biri üzərində ayrıca durmaq olar.
Ancaq həm də məsuliyyət çatışmazlığı bu məsələdə çox neqativ
təsir göstərir. Deyək ki, həkim səhlənkarlığı üzündən xəstə
dünyasını dəyişib. O halda müvafiq qurumların bu məsələni araşdırıb
səhlənkarlığı ilə neçə insanı bədbəxt etmiş həkimi məsuliyyətə cəlb
etmək əvəzinə himayə etməsi insan həyatının dəyərini və həkim
məsuliyyətini arxa plana keçirir.
Bir faktı xatırlatmaq istərdim… Son aylar oxucularımız
həkimlərin səhlənkarlığı üzündən dünyasını dəyişmiş iki uşaq anası,
Elnarə Tofiqızının qətli barədə çox yazıb. Ancaq öz səhlənkarlığı
ilə bir insanın ölümünə, iki uşağın anasız qalmasına səbəb olmuş
həkimlərin günahkar olması ilə bağlı ekspertiza rəyi olmasına
baxmayaraq, onlar bu günə qədər cəzalandırılmırlar.
Bir çox reallıqları başa düşdük, axı bunlar ki, "toxunulmazlar"
zümrəsinə daxil deyillər. Bu cəzasızlıq insan həyatına etinasız və
məsuliyyətsiz yanaşmaq üçün bir mühit yaradır. Əgər etdikləri
səhvlər üzündən insanlara zərər vurmuş həkimlər bu gün qanun
qarşısında məsuliyyətə cəlb olunsalar, o zaman savadsız və
səhlənkar şəxslər insanların həyatını bu qədər təhlükəyə atmaqdan
çəkinərlər.
Ya özlərinə başqa peşə tapar, ya da ki, daha məsuliyyətli
olarlar.
Ancaq hələ ki, insanlarımız əllərdəki cərrah bıçağını gilyotin
bıçağına çevirmişlərin güdazına getməkdədirlər. Bu üzdən dünyasını
dəyişənlərin və onların arxasınca gözü yaşlı qalanların ahı pafoslu
çıxışların gurultusu içində itib-batmaqdadır.