Əsl sənət zaman və məkandan, şəraitdən, dövrün tələblərindən asılı olmadan mütləq üzə çıxıb özünü xatırladır. Gündəmi zəbt edən, bir anda məşhurlaşan müğənnilərin müəyyən müddətdən sonra yoxa çıxdığını, xatırlanmadığını görürük. Ancaq xalqın korifey adlandırdığı, səsi və içi ilə millətinə yaxın olan nadir sənətkarlar heç vaxt unudulmur, bir filmdə, əsərdə və ya hansısa küçədə mütləq qarşımıza çıxır.

Belə sənətkarlar çoxdur: Rəşid Behbudov, Müslüm Maqomayev, Sara Qədimova, Şövkət Ələkbərova, Oqtay Ağayev... və Mobil Əhmədov.

Kult.az xatırladır ki, xalq artisti, teatr aktyoru, vokalçı Mobil Əhmədov 1931-ci il sentyabrın 10-da Gəncə şəhərində anadan olub. 1955-ci ildə Əzim Əzimzadə adına Bakı Rəssamlıq Məktəbinə daxil olan Mobil bir il sonra Azərbaycan Dövlət Konservatoriyasına qəbul edilib və Bülbülün sinfində oxuyub.

1961-ci ildə təhsilini başa vuraraq, Dövlət Radiosunun xorunda işləməyə başlayıb.

Mobil Əhmədov qırx ilə yaxın əksər tamaşalarda əsas partiyaları ifa edib. Yetmişdən çox tamaşada oynamaqla zəngin yaradıcılıq irsi yaradan sənətkar bir neçə rolunu müxtəlif quruluşlarda ifa edib.

Sənətdə anlaşılmaz, sakit bir tənhalıq yaşayan Mobilin ifasında “Qarabağın qızları”, “Tez gəl”, “Göygöl”, “Küsmərəm” kimi mahnılar bu gün də sevilərək dinlənilir.

O, klassik operettalarda və klassik milli dramaturgiya əsasında yazılmış musiqili komediyalarda Sərvər və Rüstəm bəy, Əsgər (“Məşədi İbad” və “Arşın mal alan”, Üzeyir bəy Hacıbəyov), Heydər bəy (“Hacı Qara”), Məhəmmədhəsən əmi (“Danabaş kəndinin əhvalatları”) kimi rolları canlandırıb.

Mobil Əhmədov 1978-ci ildə əməkdar artist, 2000-ci ildə isə xalq artisti fəxri adlarına layiq görülüb.

O, uzun sürən xəstəlikdən sonra 2006-cı il iyunun 3-də 75 yaşında Bakı şəhərində vəfat edib.