Matça hazırlığımız qaydasında gedir. Meydanda ən yaxşısını etməyə çalışacağıq.

Axar.az xəbər verir ki, bu sözləri “Araz-Naxçıvan”ın baş məşqçisi Elmar Baxşıyev UEFA Konfrans Liqasının III təsnifat mərhələsində Bakıda Kiprin “Omoniya” klubuna qarşı keçirəcəkləri ilk oyundan öncə təşkil olunan mətbuat konfransında deyib.

Mütəxəssis sabah tanış rəqiblə qarşılaşacaqlarını bildirib:

“Omoniya”nı təhlil etmişik. Uğurlu nəticə qazanmaq üçün əlimizdən gələni edəcəyik. Rəqibin yox, öz komandamın meydanda nə edəcəyini düşünürəm. Düzdür, “Omoniya” yaxşı təşkilatlanmış komandadır. Amma II mərhələdəki oyunlarımızdan sonra Kipr klubunun da bizə hörmət etdiyini düşünürəm”.

O, oyun üslubunu dəyişmək fikrində olmadığını vurğulayıb:

“Öz düşüncələrimiz var ki, sabah meydanda onları həyata keçirməyə çalışacağıq. Addım-addım irəliləmək istəyirik. Hazırda yalnız sabahkı oyunu düşünürük”.

E.Baxşıyev azarkeşlərdən dəstək gözlədiyini söyləyib:

“Komandaya inansınlar, biz də onları sevindirməyə çalışacağıq”.

Qeyd edək ki, avqustun 7-də “Liv Bona Dea Arena”da keçiriləcək qarşılaşma saat 20:00-da başlayacaq. Cavab görüşü avqustun 14-də Nikosiyada olacaq.