Ana səhifə Kult |
Azərbaycan Respublikasının Braziliya Federativ Respublikasındakı səfirliyinin müraciəti, Rio de Janeyro şəhər meriyasının təklifinə əsasən, Azərbaycan Respublikasının Mədəniyyət və Turizm Nazirliyi tərəfindən aprel ayının 21-dən 27-dək Rio de Janeyroda Azərbaycan Mədəniyyət Həftəsi keçiriləcək.
Axar.az xəbər verir ki, Azərbaycan Mədəniyyət Həftəsi Azərbaycan-Braziliya mədəni əlaqələrinin inkişafı, iki ölkə xalqlarının bir-birini yaxından tanıması, Azərbaycan mədəniyyətinin təbliği, ölkəmizin beynəlxalq imicinin yüksəldilməsi məqsədi ilə keçirilir.
Cənubi Amerikada ilk dəfə olaraq keçirilən və Rio de Janeyronun 450 illiyinə təsadüf edən Mədəniyyət həftəsi çərçivəsində Azərbaycan milli mətbəx nümunələrinin, ölkəmizin mədəniyyətini, tarix və memarlıq abidələrini, təbiət mənzərələrini və turizm potensialını əks etdirən "Azərbaycan dünən, bu gün və sabah" adlı fotosərgi, xalq artisti Mənsum İbrahimovun, muğam ifaçısı Arzu Əliyevanın ifasında (əməkdar artistlər Elçin Haşımovun (tar), Elnur Əhmədovun (kamança) müşayiəti ilə) muğam konserti və Azərbaycan Dövlət Rəqs Ansamblı üzvlərinin milli rəqs, xalq artisti Yalçın Adıgözəlovun rəhbərliyi ilə Braziliya Simfonik Orkestrinin və "Trio Qarabağ" muğam qrupunun konsertləri, "Nabat", "Hakim haradadır?" filmlərinin nümayişi keçiriləcək.
Tədbirlər Rio de Janeyronun "İncəsənət şəhəri"ndə ("Cidade des Artes") – "Cafe das artes", "Gallery", "Teatro de Camara", "Sala de Leitura", "Grande Sala" kimi tanınmış sənət məkanlarında təşkil olunacaq.
Tarix
2015.04.13 / 19:39
|
Müəllif
Nilufər Muğantürk
|