Təəssüf ki, oradakı rolum yarımçıq qalmışdı.

Bu sözləri əməkdar artist Naibə Allahverdiyeva yeni çəkildiyi "Qardaşlar" serialı haqda Axar.az-a danışarkən deyib:

"Hazırda çəkildiyimiz "Qardaşlar" serialı çox maraqlı alınıb, tamaşaçılar da maraqla izləyəcək. İnşallah, sentyabrda hamı ATV-yə baxacaq.

Serial komediya janrındadır. Ssenarini axıra qədər bilmirəm, hələ yazılır. Amma əsas mövzunu iki ailədə baş verən hadisələr təşkil edir. İki qardaş və onların həyat yoldaşları əsas rollardır. Məndən başqa əməkdar artist Tünzalə Əliyeva (Toppuş bacı), əməkdar artist Vəfa Zeynalova, Vüsalə Əlizadə, Əkbər Əlizadə, Fərda Xudaverdiyev, Ənvər Abbasov və başqa aktyorlar çəkilib. Serialın rejissoru Ramin Hacıyev, ssenari müəllifləri Elməddin Cəfərov, Ənvər Abbasov, Elnur Hüseynov, Tərlan Nur Yaşar və Zamid Ağayevdir.

Mən bundan əvvəl "Qız atası" serialında da çəkilmişdim. Elməddin dəvət etmişdi. Təəssüf ki, oradakı rolum yarımçıq qalmışdı. Amma çox xoşlarına gəlmişdi. Yəqin fikirləşiblər ki, o obraza bənzər bir obraz da yaratsınlar".