Nağılların uşaqların psixi inkişafında çox böyük təsiri var. Çünki uşaqlar ətraf mühit haqda informasiyanı oyunlarda, cizgi filmlərində, nağıllarda tapıb öyrənir.

Bu sözləri Axar.az-a Narınc Uşaq Psixologiya Mərkəzinin direktoru Narınc Rüstəmova deyib. Onun sözlərinə görə, bəzi nağıllarda uşaq psixologiyasına zərər yetirəcək davranışlar, sözlər yer alır:

"Təəssüf ki, bizim nağıl kitablarımız müasir standartlara və uşaq psixologiyasına uyğun tənzimlənməyib. Məsələn,"Şəngülüm, Şüngülüm, Məngülüm" nağılı 7 yaşdan yuxarı uşaqlar üçündür. 3-6 yaşlı uşaqlarda təxəyyül çox yüksək olur və onlar bu tip hekayələri, nağılları real qəbul edirlər. Hətta bizim"Oğuznamə"mizə baxsanız, görərsiniz ki, orada nə qədər kobud, şiddət tərkibli, uşaqların oxumayacağı, dinləməyəcəyi uyğunsuz sözlərdən, kəlmələrdən istifadə olunub. "Oğuznamə" yaş etibarı ilə 12 yaşdan yuxarı uşaqlar üçündür. Əslində, Avropada belə kitablar, yəni uşaq kitabları, nağıllar xüsusi nəzarət altındadır".

Narınc Rüstəmova bildirir ki, uşaqlar çox vaxt nağıldakı obrazları real qəbul edirlər:

"Məsələn, bizim gözəl nağıllarımız – "Tıq-tıq xanım", "Qoğal" 3-6 yaş arası uşaq nağıllarıdır. Valideyn burada nağılın pisini, yaxşısını deyil, uşağa uyğununu seçməyi bacarmalıdır. 6-7 yaşlı uşaqlar ölüm anlayışını qavrayırlar. Uşaq artıq həmin nağıllardan təsirlənmir, öz üzərinə götürmür. Anlayır ki, çəpiş danışa bilmir, onlar insan kimi evdə yaşamır, bu, sadəcə, nağıldır. 3-6 yaş arası uşaqlar isə beləobrazları real qəbul edirlər. Düşünürlər ki, canavar da, keçi də danışır.Oradakı obrazları yamsılayır, deyir ki, mən "Hörümçək adam" olacağam və sairə. Əgər valideyn 4 yaşlı uşağa bu nağılları danışarsa, həmin uşaq o obrazları realda görəcək, qorxacaq".

Psixoloq uşaqların nağılları fərqli mənada qavramasının fəsadlarından da söz açıb:

"İndi nağıl kitablarında giriş yoxdur.Əvvəldə"Ön söz", psixoloq rəyi olmalıdır ki, valideynin kitab haqqında informasiyası olsun. 3,5, 6 yaş arası uşaqlar üçün nağıl kitabları çox zəngin olmalıdır, oradakı nağıl personajları daha qabarıq görünməlidir, sözdən daha az istifadə olunmalıdır.Nağıl kitabındakı şəklə baxarkən uşaq pişiyin, canavarın üzündəki emosiyanı, qəzəbi görməlidir.

Nağıllar var ki, baxırsan şəkildə gülür, ancaq mətndə yazılıb ki, əsəbidir. Bu zaman uşaqda emosional pozuntu yaranır, uşaq özünü ifadə edə bilmir. Şiddət doğuran nağıllar 3-6 yaşlı uşaqların qorxmasına səbəb olur. Onlar fikirləşirlər ki, canavar gəlibmənim qarnımı yırtar, qapımızıqırar. Yaxşı olar ki, valideynlər kitab almazdan əvvəl ekspert rəyi alsınlar".