Sinan Yağmur Türkiyənin ən çox qazanan yazarlarındandır. O, 1965-ci ildə Kırşehirdə doğulub. Türkiyədə son bir neçə ildə kitabları ən çox satılan yazıçıdır. "Eşqin göz yaşları: Şəms Təbrizi" romanı qısa zamanda Türkiyədə 7 milyon nüsxə satılıb. "Eşqin göz yaşları: Həzrəti Mövlanə" və başqa romanları da böyük oxucu marağı qazanıb.

Məşhur türk yazıçısı Sinan Yağmurun Axar.az-a verdiyi müsahibəni təqdim edirik:

Paltarlarımla da mesaj vermək istəyirəm

- Geyim tərziniz qeyri-adidir, jiletiniz, boyunbağınız, üzükləriniz çox maraqlıdır. Bunların mənaları haqqında danışa bilərsiniz?

- Yazdığım sahə təsəvvüfdür. Təsəvvüf yazarkən yazarlıqdan çox dərviş kimi yazmağa səy göstərirəm. Yazdığım kitablarla əlaqədar olaraq, təsəvvüfü əks etdirən paltarları geyinmək kitabdakı mənanı tamamlamaq baxımından vacibdir. Bilirsiniz, Qərb imperializmi ölkəyə paltarla, moda sektoru ilə, müəyyən markalarla, sonra da zehniyyətlə girir. Məsələn, Amerika girəcəyi bir ölkəyə əvvəlcə kola göndərir, ardınca da cins şalvarlar. Amerikan mədəniyyəti, amerikan musiqisi, amerikan filmləri deyərkən bir də görürsən ki, amerikan mədəniyyəti yayılmaqdadır.

Mən də oxucularımla bir mənanı dərinləşdirmək üçün kitablarda yazdığım xarakterləri izah edən və ya verdiyim mesajla üst-üstə düşmək məqsədi ilə dərviş paltarları, köynəkləri, üzükləri istifadə etməyə diqqət yetirirəm. Paltarlarımla da mesaj vermək istəyirəm, məqsədim budur. Ona görə də təsəvvüfə uyğun paltarlar seçirəm.

- Konyaya 1984-cü ildə köçmüsünüz. Ondan öncə nə işlə məşğul idiniz?

- Mən 1984-cü ilə qədər Kırşehirdə bir lisey şagirdi idim. 1984-cü ildə gördüyüm bir yuxuyla daha öncə heç adını eşitmədiyim, bilmədiyim Mövlanəni tanıdım və məndə onun yaşadığı Konya şəhərinə getmək istəyi oyandı. Bu yuxumdan sonra Konyaya köçdüm və orada qalıb Mövlanənin, Şəmsin mənəvi hüzurlarını içimə çəkərək oxumaq istədim. O məqsədlə Konyaya getdiyimdə bir məsciddə namazdan sonra dua etdim, dedim ki, "Ya rəbbim, mənə Mövlanənin, Şəmsin məmləkəti olan bu torpaqlarda oxumağı, yaşamağı və son nəfəsimi verməyi nəsib elə". Daha öncə Konya adlı bir şəhərdən xəbərim yox idi, xəritədə belə yerini bilmirdim. Bu yuxudan sonra Konyaya köçdük, hazırda orada yaşayıram və ömrümün sonuna qədər Konyada yaşamaq istəyirəm. Adlarını çəkdiyim bu müqəddəslərin yaşadığı torpaqlara mütləq onların ruhları sirayət edər. O ruhlarla təmasda olmağın yolu da o torpaqlarda yaşamaq və nəfəs almaqdır. Konyaya gəlmə və burada qalma məqsədim budur. Həzrəti Mövlanə nə vaxt icazə versə, Konyadan o zaman çıxıb gedərəm.

Bunlar bir-birinə düşmən deyillər

- Müsəlman olmağınız bəllidir. Bəs təriqətiniz nədir?

- Ələvi deyiləm. Mənim ələvi olduğumu fikirləşirlər, amma sünniyəm. İçində Əhli-beyt sevgisi olan bir sünniyəm. İndi bəzi sünnilər var ki, Əhli-beytə qarşı sevgi bəsləmirlər. Fiqhdə qismən hənəfi və cəfəriyəm, etiqadda da Matüridi və Muhtezirənin fikirləri xoşuma gəlir. Şəms cəfəri idi. Şəmsi yazarkən cəfəriliyi tanımış oldum və sevdim. Bəzi məqamlarda İmam Cəfərə uyğun hərəkət edirəm, onsuz da peşə imamı olaraq qəbul etdiyim və fikirlərinə hörmət etdiyim İmam Əbu-Əzəm Hənifə Numan ibn Sabit İmam Cəfərin çox sevdiyi tələbəsidir. Hənəfi olmaq onsuz da cəfəri olmaq deməkdir, cəfəri olmaq da qismən hənəfi olmaqdır. Bunlar bir-birindən uzaq və ya bir-birindən ayrı, bir-birinə düşmən deyillər. Dünyagörüşləri fərqlidir və bir insan islamı yaşamaq üçün özünə ən uyğun, ən asan, ən əlverişli məzhəbi seçə bilər.

- Məzhəb seçmək mütləqdir?

- Məzhəbsiz olmaq yanlışdır və mütləq bir məzhəbə bağlı olub, o məzhəbin fikirlərinə uyğun elmi-halı yaşamaq lazımdır. Bu mənada mən əhli-sünnət və camaat düşüncəsinə sahibəm. Təriqət olaraq Nəqşibənilik və Mevləvilik çox xoşum gəlir. Onlara bir az yaxınlığım var. Türkiyədə ələvi olaraq tanıdığımız qardaşlarımızla o qədər də fərqli fikirlərimiz yoxdur, sadəcə bir az Əhli-beytə qarşı pis mövqedə duran sünnilərin etdiyi səhvi dilə gətirmək üçün "Kərbəla" kitabını da yazmışam. Əlbəttə, mən "Kərbəla" kitabını yazanda, Əhli-beyt sevdalısı Veysəl (Qaraniyazit) bəy və bəzi adamlar mənim ələvi olduğumu düşündülər. Halbuki bu, ələvilik deyil. Diqqət etsəniz, məsələn, bu təsbit çox önəmlidir, Türkiyədə məscidlər, mədrəsələr də olmaqla tarixi abidələrin sadəcə birində 12 imamın adı yazılıb, o da Mövlanə türbəsindədir. Həzrəti Mövlanə də Əhli-beyt sevdalısı idi. Şəmsi Təbrizi də zatən Əhli-beyt sevdalısıydı. Dolayısıyla, mən əhli-beyt sevdalısı bir sünniyəm!

Adını verə bilməyəcəm...

- Mövlanənin Şəmsi var, bəs sizin?

- Mənim də bir Şəmsim, mürşidim var. Məni qaranlıqdan aydınlığa çıxaran, dərdləşdiyim, bölüşdüyüm, söhbət etdiyim, məsləhətləşdiyim bir mürşid. Mənim mürşidim ədəbiyyat dünyasındandır. Bir yazardır.

- Qadındırmı?

- Yox, kişidir. Amma adını deyə bilməyəcəm. Bu haqda kitab yazmışam və həyat yoldaşıma vəsiyyət etmişəm ki, mən öləndən sonra bu kitabı nəşr etdirsin...