Bakıda Nazim Hikməti anma gecəsi keçiriləcək.

Nazirlikdən Axar.az-a verilən məlumata görə, gecə Azərbaycan Respublikası Mədəniyyət və Turizm Nazirliyi və Azərbaycan Yazıçılar Birliyinin dəstəyi, Türkiyənin Azərbaycan səfirliyi nəzdində fəaliyyət göstərən Bakı Yunus Əmrə İnstitutunun təşkilatçılığı ilə həyata keçiriləcək.

Martın 4-də, saat 18:00-da "Türk ədəbiyyatı günləri" çərçivəsində baş tutacaq ilk proqramda Azərbaycan Respublikası Mədəniyyət və Turizm naziri Əbülfəs Qarayev, Türkiyənin Azərbaycandakı səlahiyyətli səfiri Alpər Coşqunla yanaşı, şairlər, yazıçılar və alimlərin iştirakı gözlənilir.

Qonaqlar arasında Nazim Hikmətlə görüşmüş, şairin yaradıcılığı ilə bağlı əhəmiyyət kəsb edən işlər görmüş önəmli şəxsiyyətlər olacaq.

Qeyd edək ki, Azərbaycan Nazim Hikmətin həyatında çox əhəmiyyətli bir yer tutub. Hətta böyük şair Bakıda etdiyi çıxışların birində "Bu dünyada öyrəndiyim nə varsa, çoxunu sizlərdən öyrənmişəm", - deyib.